“Queremos construír sociedades mellores”, asegurou Carmela Silva na sinatura do convenio coa Universidade de Vigo para a promoción da mobilidade internacional do seu alumnado. Silva, acompañada polo reitor Manuel Reigosa, a vicerreitora María Isabel Doval, a alumna Tania Pereira (beneficiaria dunha bolsa nunha universidade mexicana) e o profesor do IES Luis Seoane de Pontevedra Modesto Rozas,  destacou a importancia do programa Erasmus + “para crear mentes que se adapten e respondan ao mundo global”.

O convenio asinado entre a presidenta da Deputación e o reitor da Universidade de Vigo permite subvencionar 100 bolsas de 1.000 euros cada unha que “serven de axuda e complemento ás bolsas de Erasmus e ás bolsas propias de intercambio da Universidade de Vigo durante este curso”. Máis polo miúdo, as achegas distribúense en 90 bolsas destinadas para as e os bolseiros do programa Erasmus + (en universidades europeas) e outras 10 para os e as beneficiarias das bolsas propias de intercambio da Universidade de Vigo (noutras institucións de países estranxeiros).

Para a presidenta da Deputación de Pontevedra é fundamental o programa Erasmus + e, por ese motivo, “é necesario que as universidades e as administracións públicas esteamos comprometidas con destinar todos os recursos posibles para promovelo e construír, así unha vida digna, persoas que sexan capaces de responder a un mundo novo que xa está aquí”. Tamén recordou que o convenio entre a institución provincial e a universidade “xorde dunha situación de crise económica, onde se recortan recursos para a universidade o que estaba impedindo que moito alumnado non puidese acceder ao programa Erasmus+, un dos máis revolucionarios dos creados pola Unión Europea”.

Pola súa banda, o reitor da Universidade de Vigo fixo fincapé na importancia do programa Erasmus +: “creo que é o programa que máis está a facer por construír unha Europa que sexa garantía de paz, de progreso, de desenvolvemento social e xustiza que é o que todas e todos queremos”. Ademais, o reitor engadiu que se trata dunha iniciativa que permite ao alumnado “ter unha experiencia preprofesional e persoal que lles aporta máis fortaleza para afrontarse ao mundo globalizado”. Neste eido insistiu Tania Pereira, estudante do Grao de Ciencias do Mar que estivo de Erasmus nunha universidade mexicana, quen relatou a súa experiencia persoal nun programa “que fai medrar como persoa individual xa que contribúe a enfrontarse ao mundo saíndo da zona de confort”.

En total, a Deputación de Pontevedra leva investido na promoción da mobilidade internacional da Universidade de Vigo 350.000 € que permitiron que 350 alumnas e alumnos puidesen completar a súa formación académica no estranxeiro.

Erasmus + Practicum Depo
Xunto ás achegas que destina a Deputación de Pontevedra á Universidade de Vigo para o fomento da mobilidade internacional do seu alumnado, a presidenta tamén afondou no proxecto propio da institución provincial, o Erasmus + Practicum Depo.  “Levamos investido 2,5 millóns de euros nesta iniciativa que está a permitir que 350 alumnas e alumnos e 40 profesoras e profesores de FP poidan realizar mobilidades noutros países da Unión Europea. Cubrimos, polo tanto, o espazo de apoio ao programa Erasmus tanto na universidade como na FP”, destacou Carmela Silva.

A presidenta puxo en valor esta iniciativa que está “ligada á actividade laboral e á formación” e agradeceu “o enorme compromiso dos IES e centros de FP e do equipo de Emprego da Deputación sen os cales non sería posible desenvolver este proxecto”. Precisamente neste mesmo eido fixo fincapé Modesto Rozas, coordinador de Proxectos Europeos do IES Luis Seoane de Pontevedra, quen falou en nome do profesorado beneficiario do Practicum Depo. O profesor destacou a importancia da iniciativa “para adquirir experiencias e competencias que ficando no mesmo lugar non se asumirían” e explicou as posibilidades do programa para completar a formación do profesorado.