O Real Automóbil Club de España - RACE e Goodyear realizaron na sede de  Cidaut, Valladolid, un 'crash test' que arroxou resultados preocupantes, xa que millóns de españois viaxan en coche en posicións que, en caso de accidente, son incompatibles coa vida. As probas efectuáronse por mor dos resultados dunha enquisa na que millóns de españois confesaban realizar os seus desprazamentos co respaldo recostado, o cinto de seguridade mal posto (ou mesmo sen el), obxectos soltos no habitáculo, ou cos pés sobre o cadro de mandos do vehículo.

En base a estes datos, no 'crash test' colocouse ao condutor suxeito con cinto de seguridade folgado, nunha posición próxima ao volante; ao copiloto, co respaldo recostado e as pernas no cadro de mandos; e ao pasaxeiro traseiro esquerdo, sen cinto de seguridade e suxeitando nos seus brazos a un bebé, e someteuse o vehículo a un impacto frontal a 56 km/h. Os resultados foron letais.

Para o condutor: a presión exercida polo ocupante traseiro supera as dúas toneladas e as aceleracións de pescozo e cabeza superan os niveis máximos, facendo o choque incompatible coa vida.

Para o copiloto: a compresión do tórax supera o dobre do límite tolerable por unha persoa, con causa mortal. A cabeza do dummie golpea contra as pernas, e tamén supera os niveis máximos. As pernas, pola súa banda, rompen a lúa dianteira, con danos graves.

Para o ocupante traseiro: a forza que proxecta o adulto é de 3,5 toneladas métricas, esmagando ao bebé contra o asento dianteiro, primeiro, e ao condutor contra o volante, a continuación. Durante a fase de rebote, o ocupante voa polo habitáculo, golpéase tamén contra o teito e finaliza o impacto sobre o corpo do bebé. As consecuencias son tamén fatais.