A presidenta da Deputación de Pontevedra, Carmela Silva, expresou esta semana a súa satisfacción trala apertura ao tráfico esta fin de semana da nova Avenida de Tomiño, “un dos maiores retos de mobilidade urbana e seguridade viaria que afrontamos nestes catro anos de mandato”. A ambiciosa actuación viaria, impulsada a través dun convenio entre a Deputación, o concello de Tomiño e a Xunta, tivo un orzamento total de 3,5 millóns de euros, dos que a Deputación foi quen fixo a maior aposta económica cun investimento de máis de 2 millóns de euros, 2.111.766,73, o que supón o 66% do importe total.

A nova Avenida supón a posta en marcha dunha variante que mellora a conexión entre a EP 3102 (Tomiño-Sabarís) e a PO-344, ao seu paso polo núcleo urbano de Seixo, que permite derivar o tráfico de paso cara o exterior do tramado urbano, mediante unha vía poboacional. Para a presidenta provincial Carmela Silva, “con este proxecto proporcionamos unha mellora substancial da calidade urbana e seguridade viaria á cidadanía de Tomiño, e cumprimos cos nosos obxectivos dunha mobilidade baseada na sustentabilidade, centrada nas persoas e na seguridade das nosas vilas e cidades”. Amais, dixo a presidenta “seguimos na nosa liña de dotar de equipamentos, servizos e dereitos a todas as persoas vivan onde vivan”. Deste xeito, mellorouse a mobilidade e integración urbanística deste conxunto urbano, permitindo unha mellor permeabilidade e accesibilidade do sistema viario adscrito. De feito, ata o momento no núcleo urbano había un grave problema de conxestión de tránsito de vehículos, con entre 5.000 e 10.000 vehículos ao día, un problema que se foi agravando co paso do tempo xa que nos últimos 15 anos a poboación de Tomiño aumentou un 30%, e as estradas referidas conectan unha serie de equipamentos públicos como o instituto, o pavillón polideportivo, o campo de fútbol, o centro de saúde, o centro de día, o colexio público ou varios edificios administrativos.

A nova variante, cuxo proxecto realizou, licitou e executou a Deputación, abrangue un trazado de 1qm + 318 m. A sección tipo consta de 9,5 metros dedicados a unha plataforma de dobre sentido de circulación, cunha configuración de 7 metros para calzada (3,5 por carril) e 1,5 / 1  metros de beiravía en cada marxe, así como 6 metros para unha senda de bicicletas e pedestre, que presta tamén acceso ás parcelas que o precisen nesa marxe. Ademais, a sección complétase ata os 20,5 metros de ocupación media con obxecto de dar cabida as bermas de 0,5 metros para a calzada, e cunetas de 2 metros para a correcta execución e funcionalidade da plataforma. Pola súa banda, tamén se construíron cinco glorietas sobre o viario existente, e proxectouse a maiores unha conexión urbana de 150 metros co centro urbano de Seixo.

10 millóns de euros no mandato

Desde a súa chegada á Deputación de Pontevedra o goberno de Carmela Silva leva investidos en Tomiño case 10 millóns de euros procedentes de todas as áreas de goberno. É o maior investimento da historia da institución provincial neste concello do Baixo Miño.

 

Carmela Silva: “Seguimos a cumprir co noso compromiso de dotar de equipamentos, servizos e dereitos a todas as persoas vivan onde vivan”

 

So coas partidas do Plan Concellos, o goberno municipal de Tomiño puido financiar 25 obras de relevancia entra as que se atopan o saneamento de Pazos, Rexidouro, Vilachan, Sanomedio e a Val ou Carregal de Abaixo; a reforma e mellora da accesibilidade no salón de plenos do concello; a mellora do terreo de xogo do campo de fútbol de Carballa e das instalacións do campo de fútbol do Alivio; a Senda peonil no camiño novo; a adaptación da accesibilidade na alameda de Goian; o acondicionamento da Praza de Figueiró; a mellora dos camiños municipais no concello; e a da seguranza viaria na vila. Tamén, a través da liña 3 de Emprego do Plan Concellos, o municipio puido contratar a 99 traballadoras e traballadores.

Amais, Tomiño conta cun proxecto do Plan DepoRemse, para a mellora da mobilidade e da seguranza viaria na contorna dos equipamentos públicos da praza do Seixo cun investimento de medio millón de euros; e tamén figura como un dos municipios beneficiarios do programa de iluminación sostible IDAE da Deputación de Pontevedra.