As viaxes en minicruceiros polas rías galegas que permiten coñecer o legado fenicio en Galicia, as Rutas dos Fenicios polo Atlántico, ofrecerán en 2020 itinerarios a vela de seis, dous e un día de duración para conseguir alongar a experiencia e dotala de autenticidade.

Así o anunciou  na Feira Internacional de Turismo, Fitur, a directora de Turismo de Galicia, Nava Castro, quen participou na presentación da nova campaña desta iniciativa impulsada pola Xunta coa que os participantes, ademais de observar as paisaxes desde o barco, poden empregar unha aplicación de realidade aumentada que lles permite apreciar os detalles de cada lugar permitindo coñecer xa unha vintena de elementos patrimoniais que atestigua o paso dos fenicios por Galicia.

A Ruta dos Fenicios polo Atlántico percorre as rías de Vigo, Arousa e Pontevedra coa intención de poder incluír unha ruta polo Alto Miño no futuro. Esta experiencia turística foi premiada o pasado ano polo Itinerario Cultural Europeo dos Fenicios nun acto celebrado na localidade italiana de Bari, na que tamén recibiron galardóns Sicilia e Plugia. Alí deuse forma á declaración de Bari para consolidar a tradición turística dos territorios da ruta dos fenicios.