O proxecto Smartpeme, que a Deputación de Pontevedra presta desde o ano 2016 para o asesoramento tecnolóxico e de mellora de competitividade a pemes, persoas autónomas e emprendedoras, continúa crecendo e impulsando o desenvolvemento económico do tecido empresarial da provincia. A Xunta de Goberno acaba de adxudicar o servizo de evolución e xestión da Rede Smartpeme para este ano 2020 e o 2021 á empresa KMPG Asesores SL, por un orzamento de 975.018 euros. A presidenta Carmela Silva recalcou “o grande éxito deste programa que só no ano 2019 levou a cabo máis de 2.200 asesoramentos con 530 empresas da provincia e con actividades nas que participaron máis de 2.000 persoas”.

“Smartpeme _indicou Silva_ é un servizo que prestamos a autónomas, autónomos, pemes e a emprendedoras e emprendedores para que teñan instrumentos TIC que lles permitan poder ter unha maior calidade de prestacións de todos os servizos da súa empresa a través deses novos modos de facer negocio, de facer habilidade económica”. Recalcou que as cifras destes anos “son un bo eco da importancia de Smartpeme, e de como as empresas demandan este tipo de actuacións por parte das administracións públicas”, lembrando que desde o 2016, cando se puxo en marcha o programa, houbo “6.000 asesoramentos a 1.300 empresas da provincia e máis de 1.300 actividades con 8.000 asistentes”.

 

O servizo  realizou en 2019 máis de 2.200 intervencións con 530 empresas da provincia

 

A presidenta anunciou que neste novo período o servizo vai incorporar novidades, en concreto, “os Obxectivos de Desenvolvemento Sostible da Axenda 2030 e tamén todo o que ten que ver coa Responsabilidade Social Empresarial”. “Van ser _explicou_ outros dos servizos que van formar parte de Smartpeme, porque imos levar os ODS a todas as actuacións que desenvolvemos na Deputación de Pontevedra”.

Máis polo miúdo, a aposta polos ODS da Axenda 2030 da ONU, centrarase desde a carteira de servizos de Smartpeme Impulsa na contribución activa aos obxectivos de educación de calidade (número 4 dos ODS); igualdade de xénero (número 5); traballo decente e crecemento económico (8); industria, innovación e crecemento económico (9) e produción e consumo responsable (12).

Por outra banda, Smartpeme Conecta, que se concibe como o punto de encontro entre as necesidades de servizos TIC das empresas pontevedresas e as persoas que prestan estes servizos e a través do que se desenvolveron acordos con numerosos axente aglutinadores de empresas, seguirá avanzando na colaboración con outros axentes clave relacionados cos servizos Smartpeme.