O conselleiro de Cultura e Turismo, Román Rodríguez, e o reitor da Universidade de Vigo (UVigo), Manuel Reigosa, asinaron esta semana un protocolo de colaboración polo que a institución académica se suma como socio ao proxecto Vigo crea. Barrio creativo, iniciativa impulsada pola Xunta de Galicia e o Consorcio Casco Vello que ten como obxectivo fomentar o talento local e a actividade de emprendedores culturais. Trátase dun acordo a través do que ambas institucións suman esforzos para o impulso deste plan, que persigue poñer en valor as industrias creativas e turísticas da contorna e Galicia. No acto tamén estiveron presentes a delegada da Xunta en Vigo e presidenta do Consorcio Casco Vello, Corina Porro, e o director xeral de Políticas Culturais, Anxo M. Lorenzo.

Tras a sinatura do protocolo, o titular de Cultura e Turismo destacou a relevancia do apoio da Universidade de Vigo a este proxecto, que multiplica así o alcance e as metas ás que Vigo Crea pode aspirar. “Estamos ante un proxecto pioneiro que desde hoxe conta coa forza da UVigo e o talento dos futuros emprendedores que saian destas aulas”, salientou Román Rodríguez, quen agradeceu a disposición do equipo reitoral para incorporarse ao Barrio Creativo, “un aliado co que gaña Vigo e gañan todos os vigueses”, declarou o conselleiro.  

 

Proxectos nacidos no ámbito académico, vencellados ás industrias creativas, poderán formar parte desta iniciativa para continuar o seu crecemento

 

O protocolo asinado permite axilizar os tempos para que Vigo Crea. Barrio Creativo sexa unha realidade nos próximos meses. Neste sentido, contempla o desenvolvemento de liñas de actuación conxuntas e facilita a cooperación entre a Xunta e a Universidade. Entre outras medidas, propiciarase que novos proxectos seleccionados por esta poidan albergarse en espazos do Casco Vello de Vigo, que serán cedidos ao Goberno galego polo Consorcio.

Mentoring e accións conxuntas
Deste modo, ideas nacidas no seo da Universidade poderán formar parte de Vigo Crea, que contará con accións de mentoring e acompañamento para o progreso dos mesmos. Igualmente, as futuras sedes do CGAC e a UVigo na praza do Berbés poñeranse a disposición das partes para levar a cabo iniciativas e programación de carácter cultural.

Unha comisión de seguimento, integrada por representantes da Xunta e da Universidade, encargarase máis adiante de aprobar un plan de actuacións anuais no que se recollerán de maneira detallada as colaboración no marco do proxecto Vigo Crea. Barrio Creativo.