O empresario Enrique Lago seguirá á fronte dos comerciantes de Redondela tras non presentarse ningunha outra candidatura que optase á presidencia da asociación.

Na última xuntanza do equipo directivo, xa en funcións dende o pasado 16 de xaneiro, os integrantes pediron a Enrique Lago Granada que se mantivera a fronte da nova directiva e conformará unha candidatura que foi ratificada o pasado día 20 na Asemblea Xeral.

Enrique conta con importantes colaboradores e colaboradoras que se teñen convertido en imprescindibles no equipo de xestión, tal e como Rosa Amoedo, que desenvolve profesionalmente un posto de asesora financeira en Mediolanum, seguirá a fronte da Tesourería da entidade.

Explican que o reto dos vindeiros anos é traballar por mellorar as condicións financeiras para poder asumir con solvencia a xestión de novos proxectos e subvencións “nas que xa estamos a traballar e que consideramos contribuirán moi positivamente ao desenvolvemento socioeconómico do municipio”.