O Goberno Municipal do Porriño deberá elaborar un plan director para acometer o saneamento pendente a proposta do Partido Popular.

Na actualidade a maior parte da poboación do Porriño non dispón de conexión á rede municipal e debe de recurrir a sistemas de saneamento individuais. A día de hoxe quedan por conectar unhas 2.000 vivendas e unha extensión aproximada de 88.500 m de rede pública por acometer.

Tal e como explicou no pleno o concelleiro, Abel Estévez, "as cifras do saneamento pendente impóñense e requírese un compromiso firme do Goberno Municipal".

As parroquias de Pontellas e Budiño son nas que máis rede queda pendente, con 495 e 365 vivendas sen conexión, respectivamente. No resto das parroquias do municipio a situación non dista moito. En Mosende quedan por conectar á rede 280 vivendas, 215 en Chenlo, unhas 130 en Torneiros, máis de 170 na parroquia de Atios, e 45 tanto en Cans como no Porriño.

 

Unhas 2000 vivendas están sen conexión no municipio e as parroquias son as grandes perxudicadas

 

"Somos conscientes de que rematar a rede pública de saneamento supón un gasto moi superior ao orzamento do que se dispón, pois requeriría unha inversión aproximada de 18 millóns de euros", explica Estévez, "Por iso é esencial que o goberno local adquira un compromiso en firme no que prime planificación fronte á improvisación e a arbitrariedade coa que se está a actuar, para conseguir unha maior eficiencia no investimento e poder avanzar en firme cara a total conexión á rede municipal de saneamento de todos os veciños do Porriño".

A falta de planificación e proxecto do goberno municipal xenera situacións como a que se deu nas obras de saneamento de Liboeira-Casal, na parroquia de Atios, que se prolongaron durante 4 meses perxudicando aos veciños da zona  que a día de hoxe continúan sen conexión.

Atendendo a esto, os populares presentaron no pleno unha moción reclamando ao Goberno Municipal a elaboración dun estudo preliminar da rede de saneamento no termo municipal que determine con exactitude os tramos pendentes de acometer, e detecte as actuacións máis urxentes. En base a este estudo, o Concello do Porriño deberá elaborar unha planificación técnica, temporal e económica das actuacións a acometer.
"Falamos dunha cuestión prioritaria, dun servizo básico e esencial que estamos obrigados a dispoñer e que está a supoñer un grave perxuizo á veciñanza das parroquias", apunta o voceiro popular, Alejandro Lorenzo, "Os veciños e veciñas do rural deben dispoñer dos mesmos servizos que os do casco urbano e Concello do Porriño deber garantir que así sexa. A calidade de vida dun porriñés non pode depender de onde viva".