En momentos tan duros e de incerteza como os que estamos a vivir, cómpre que as administracións e os Corpos e Forzas de Seguridade potencien o seu lado humano, sensible e empático, especialmente co sector da poboación que máis está a achacar as circunstancias de encerro, os nosos cativos, porque na meirande parte dos casos non comprenden a situación de confinamento e surxen reaccións de frustación, tristura, enfados, rabietas... Por iso desde o Concello de Mos, a iniciativa da Policía Local, surxiu a idea e a vontade de volcarse nos máis pequenos e facerlles que o día a día sexa o máis ameno posible.

Para elo os axentes locais de Mos iniciaron onte unha iniciativa moi emotiva á par que divertida e innovadora: acudir ao domicilio dun neno que se atopaba de aniversario para felicitalo coas luces e sirenas do seu coche patrulla. A acción produciuse ás 20.00 horas da tarde e, neste caso, o pequeno cumpría 3 aniños, e acudiuse a felicitalo a petición da súa nai.

A partir de hoxe calquera familia mosense con nenas e nenos de ata 10 anos de idade que cumpran anos poden sumarse a esta iniciativa da Policía Local de Mos. os axentes realizarán as felicitacións dentro das súas labores de patrullaxe diarias.

Dado que a poboación infantil de Mos nese rango de idades non é tan extensa, e aproveitando que as patrullas locais mosenses atópanse todo o día na rúa, os axentes da Policía mosense decidiron poñer en marcha esta iniciativa, xa que ademais da seguridade cidadá, en momentos de crise coma este, tamén é importante a ledicia dos cativ@s, que son un dos colectivos que máis está a sufrir este confinamento.

Os pais e nais mosenses que queiran solicitar que a Policía Local pase a felicitar ao seu fillo no seu aniversario poden facelo escribindo ao enderezo de correo electrónico policia@concellomos.es especificando o nome do cativo, a dirección do seu domicilio, un número de teléfono de contacto e a data do aniversario.

A alcaldesa de Mos, Nidia Arévalo, aproveitou hoxe para darlle as grazas á Policía Local "por estar día tras día nas rúas, para protexernos e axudarnos en todo o que está nas súas mans. Polo seu exemplar labor nestes duros momentos de crise e o seu interese e empatía para tentar arrincar sorrisos infantís durante intres especialmente complicados e incomprensibles para os pequenos". A rexedora local tamén lle agradeceu "ás familias dos pequenos que nos fagan partícipes da celebración dos cumpreanos dos seus fillos".