O Consello da Xunta aprobou o decreto polo que se autoriza o cambio de titularidade a prol do Concello de Gondomar de dous treitos antigos da estrada provincial Nigrán- Vincios.

O Concello de Gondomar e a Deputación Provincial de Pontevedra asinaron un convenio para levar a cabo as obras de humanización da interconexión das rúas San Bieito e Emigrante coas estradas de Peitieiros e Chaín-Morgadáns. Este acordo recollía que ao rematar os traballos, a Administración local debía solicitar a transferencia destas vías.

Unha vez que o Pleno da corporación provincial aprobou a proposta de cambio de titularidade, a Consellería de Infraestruturas e Mobilidade autoriza a transferencia do treito de 110 metros que comeza no punto quilométrico 7+190 e do de 60 metros que remata no 7+540

Estes treitos presentan unhas características funcionais e de utilidade asimilables ao viario municipal de tipo urbano e facilitan o acceso a fincas e edificacións lindeiras.

A transferencia a prol do Concello tramítase de acordo co previsto na Lei 8/2013, do 28 de xuño, de estradas de Galicia, que estable a súa aprobación por decreto da Xunta, a proposta da Consellería de Infraestruturas e Mobilidade como competente en materia de estradas e logo do acordo entre as administracións implicadas.

Co cambio de titularidade aprobado hoxe polo Executivo autonómico, o concello pontevedrés terá a competencia para actuar nestas vías e asume a responsabilidade da súa conservación e mantemento.

O Decreto producirá efectos desde o día seguinte ao da súa publicación no Diario Oficial de Galicia (DOG).​