A Federación galega de Servizos, Mobilidade e Consumo (FeSMC-UGT-Galicia) esixe a realización de test de detección de COVID-19 a todos os traballadores e traballadoras do sector do comercio galego. O Sindicato lembra que desde o comezo da emerxencia sanitaria do COVID-19 as traballadoras e traballadores do sector de comercio, que desenvolven actividades esenciais, realizaron unha importante labor garantindo o abastecemento durante o período de confinamento.

Os establecementos comerciais (supermercados e grandes superficies) están a ser agora mesmo un dos lugares de maior interacción social e, polo tanto, deben ser unha prioridade á hora de tomar medidas co fin de diminuír o número de contaxios.

Desde UGT esiximos en todo momento que se extremasen as precaucións, dotando aos traballadores e traballadoras dos medios de protección necesarios, tanto pola súa propia seguridade, como pola dos clientes e, polo tanto, da sociedade no seu conxunto.

Comezan a ser frecuentes os casos de afectados polo virus entre o persoal dos centros. Por iso, cremos que é urxente a realización de test de detección. O contacto continuo e próximo, tanto cos clientes, como co persoal de loxística ou subcontratas, unido á falta en moitos casos do material de protección necesario, multiplica a situación de risco á que se ven expostos cada día.

Existe a obrigación de garantir a súa seguridade:

• Porque o seu labor é esencial.

• Porque non poden converterse en transmisores asintomáticos que os convertan nun foco de propagación do virus.
• Porque llo debemos.

Por todo isto, UGT solicita de forma urxente a realización de test de detección de Coronavirus a todo o persoal das empresas do sector de comercio de Galicia que se atopan prestando servizo durante o estado de alarma. Unha vez que se poida realizar a todo o persoal que traballa no ámbito hospitalario e colectivo de residencias, deberían de ser considerados, xunto cos corpos e forzas de seguridade do Estado, o colectivo máis sensible da sociedade pola súa actividade.