Autocoidado para educadoras/es sociais que prestan servizos esenciais

O ámbito laboral é unha das dimensións vitais que máis inflúen no benestar das persoas. Se ben a profesión de educación social ten unha carga vocacional e de implicación persoal que leva consigo un alto grao de satisfacción persoal, tamén se trata de profesionais que se expoñen a moitos factores xeradores de estrés. As educadoras e educadores sociais, ao traballar dende a proximidade ás persoas, viven situacións de gran impacto emocional (permanente contacto co sufrimento humano por situacións de pobreza, vulnerabilidade, exclusión ou conflito; dilemas éticos; falta de recursos...)

Para afrontar estas situacións e minimizar o seu impacto negativo no propio benestar da/o profesional, o Colexio de Educadoras e Educadores Sociais de Galicia está a levar a cabo unha actividade de autocoidado que as persoas colexiadas poden seguir a través da súa páxina web de forma gratuíta.

Precisamente neste momento de crise sanitaria, onde a educación social se reafirma como profesión esencial, poden agudizarse esas situacións que xeran desgaste profesional, esgotamento e frustración, ao que se lle poden sumar ademais outros factores como: inseguridade ante o contaxio, cambios organizativos no eido laboral, maiores dificultades de conciliación co peche dos centros educativos, etc. Cobra polo tanto maior importancia a necesidade de reforzar as capacidades de autocoidado persoal.

Este recurso que ofrece o colexio profesional está concibido como un espazo para a aprendizaxe e a reflexión, que chega a través de breves pílulas diarias en forma de vídeo, audio ou texto, que convidan á conexión co propio corpo e á reflexión sobre os coidados. É unha mirada cara dentro, focalizando a atención nas cuestións que incrementan o benestar propio e tomando conciencia dos efectos negativos do traballo diario para poder xestionalos adecuadamente.