Ante a demanda dos sectores produtivos da provincia, especialmente o turístico, o sector servizos e as pemes,  a Deputación de Pontevedra instou hoxe ao presidente da Xunta de Galicia a revogar a orde do 31 de marzo pola que se duplica o tempo para a tramitación dos ERTES, “o que está a provocar unha incomprensible lentitude nos procedementos cando trátase dun instrumento fundamental para evitar máis perdas ou mesmo desaparicións de empresas”

A presidenta provincial, Carmela Silva, remitiu a semana pasada unha carta a Núñez Feijoo na que sinala que “con esta orde de dar 10 días para pronunciarse sobre a forza maior que alegan as empresas par acollerse a un ERTE, Galicia dobra os 5 días que teñen o resto das comunidades. Falamos de expedientes de cuxa resolución dependen os ingresos a conta que esperan moitas familias afectadas, engade a presidenta, e non podemos permitir que isto ocorra. A xente ten que recibir canto antes os recursos”.

Silva apela a que, “tendo en conta que a orde da Xunta está fundamentada en que o volume de solicitudes presentadas fai imposible a resolución de 5 días que marca o  Estado, o goberno provincial rógalle que arbitre medidas de reforzo de persoal, material e tecnolóxicas necesarias para dar cumprimento os prazos do  Real Decreto”.