A Deputación de Pontevedra vén de aprobar por resolución presidencial dúas novas axudas para o concello da Guarda por valor de 63.238,55 €. En concreto mediante estas achegas, enmarcadas na liña 1 do Plan Concellos da institución provincial, a vila poderá mellorar a pavimentación da rúa de Pintán, por valor de 48.292,15 €, e instalar dez luminarias led nas rúas Bouza da Fonte e Vigo, cun investimento de 15.946,40 €.

Máis polo miúdo, o concello da Guarda poderá renovar o pavimentado no camiño rural da Rúa Pintán, sita no núcleo rural do mesmo nome na parroquia de Salcido. Trátase dun camiño de 490 metros que na actualidade presenta un firme de aglomerado que vai ser renovado na súa totalidade, tanto no que respecta á súa capa de rodada como na rectificación da cota dos rexistros dos diferentes servizos existentes na zona.  O prazo previsto da actuación, na que se investirán máis de 48.000 euros, prevese de aproximadamente cinco días.

Por outra banda, a Deputación tamén aprobou destinar preto de 16.000 € para instalar ata 10 puntos de luz nas rúas Bouza da Fonte e Vigo. No caso da rúa Vigo, prevense substituír e renovar o alumeado no tramo que coincide co Conservatorio de Música, instalando ata catro puntos de luz led, máis eficientes e sostibles. No que respecta á rúa Bouza da Fonte, serán en total 6 os puntos de luz que se renovarán e substituirán tamén por leds.