UGT-Galicia aposta por prolongar os ERTES para garantir o emprego

Os datos do paro revelan a necesidade de estender as medidas de protección social

Os datos do paro do mes de abril, ofrecidos hoxe polo SEPE, amosan o impacto da crise do COVID-19 sobre o mercado de traballo e revelan a necesidade de estender as medidas de protección social e os ERTE.

O número de persoas en situación de desemprego aumentou este mes nun 9,83% (17.148 persoas máis que no mes anterior). Unha porcentaxe de incremento moi superior ao 7,97% que se rexistrou no resto do Estado. En relación a hai un ano, o incremento foi dun 15,28%. Non se constataban incrementos tan altos en Galicia, tanto mensualmente como anualmente, dende o ano 1996.

Estes datos reflicten a finalización dos contratos temporais e os empregos perdidos polos despedimentos, individuais ou colectivos, a pesar de contar coa posibilidade de utilizar ERTE. O volume total de desempregados (191.629) encamíñase ás cifras do acontecido durante a gran recesión. Ademais, estes datos amosan a fraxilidade do mercado laboral, cunha alta porcentaxe de contratación temporal e precaria, que é capaz de destruír emprego dun xeito masivo en poucos días.

Hai que ter en conta que o número de persoas afectadas por ERTES ascende a 200.494, cun total de 35.821 expedientes. Cerca de catro millóns de persoas traballadoras afectadas por este tipo de medida no conxunto do Estado.

Pola súa banda, a caída no número de contratos rexistrados (un 57,3% no mes e un 71,6% no ano), con taxas similares tanto nos indefinidos como nos temporais, avanza outra parte do impacto do coronavirus sobre o emprego. Ademais, dende UGT-Galicia alértase que dende que hai series históricas non se rexistraban caídas tan elevadas.

A afiliación á Seguridade Social amosa unha redución mensual dun 2,8% e dun 3,54% interanualmente, descendendo ata os 974.770 afiliados.

Os datos de protección por desemprego reflicten unha parte da situación actual. Coa información a marzo, a taxa de cobertura era do 64,6% e hai en Galicia aínda 70.500 persoas sen ningún tipo de cobertura.

A crise non finaliza co fin do Estado de Alarma, polo que as medidas de protección deben continuar

UGT-Galica segue apoiando a continuidade das medidas de protección ao emprego e de protección por desemprego, mentres dure a situación de crise. Neste senso, o Sindicato defende a ampliación no tempo do procedemento dos ERTE naqueles sectores produtivos e empresas onde sexa necesario; así como a necesidade de que se aprobe un ingreso mínimo vital de emerxencia, considerando que hai en Galicia un total de 57.200 fogares con todos os activos no paro e 32.700 nos que non entran ingresos.

Para UGT, resulta imprescindible continuar aplicando medidas económicas e laborais que protexan ás persoas que perderon o emprego, non poden acceder a un ou se viron afectados por unha redución de ingresos. Urxe poñer en marcha unha renda mínima conxuntural e extraordinaria que de cobertura a todas aquelas familias que quedaron fóra do escudo de protección social e ata que se faga realidade unha Lei de ingreso mínimo vital.

UGT-Galicia reclama diálogo social coa Xunta para avanzar no deseño dun plan de reconstrución para o impulso económico e social

Ademais, o Sindicato considera que o diálogo social, tanto no Estado como coa Xunta, debe avanzar no deseño dun plan de reconstrución para o impulso económico e social que considere a recuperación como unha oportunidade para cambiar o modelo produtivo e de benestar social, tomando como marco o piar europeo de dereitos sociais e os obxectivos de desenvolvemento sostibles.