Esta mañá ás 14.00 horas celebrouse por videoconferencia o Pleno Ordinario do mes de maio no que se aprobou un recoñecemento extraxudicial de crédito por importe de 290.000 euros para pago a proveedores.

Trátase de facturas correspondentes ao ano 2019 pero que foron presentadas polos respectivos proveedores en 2020 por iso teñen que ser recoñecidas en Pleno. Na súa maioría son facturas referidas a servizos esenciais e xerais con emisión de facturación periódica ao Concello tales como os subministros eléctrico, telefonía e Correos; o cánon de Sogama, o servizo municipal de recollida de lixo… etc.

Sobre este recoñecemento extraxudicial de crédito a alcaldesa de Mos, Nidia Arévalo, declarou hoxe que “en principio está previsto que este poida ser o último do presente 2020 e os recoñecementos extraxudiciais de crédito aprobados no que vai de ano, foron posibles grazas a que aprobamos o orzamento en tempo e forma e xa estaban contemplados nel para poder asumilos. Cando o ano pasado aprobamos o orzamento municipal para 2020, desde o goberno local xa anunciamos que se trataba dun orzamento de transición para reconducir e depurar a situación económica municipal previa e, sen embargo estamos a mellorar as previsións iniciais que había cando o aprobamos, e así se constata desde Intervención e Tesourería”.

“A situación de liquidez da administración local é moito mellor agora que fai un ano, como así certifica o informe de Tesourería que especifica que: “apréciase unha considerable melloría con relación aos primeiros meses do ano e respecto do mesmo período do ano 2019 (os informes mensuais sobre os orzamentos de tesourería recollen este dato)””, explicou a rexedora local mosense.

Ademais Arévalo informou de que, a data de hoxe, o ‘desfase de liquidez’, é dicir, os pagos pendentes a proveedores en Tesourería, é un 73,3% inferior que fai un ano, en maio de 2019. A reducción dos pagos pendentes a proveedores en Tesourería foi máis que considerable en tan só un ano, sendo a porcentaxe de reducción de débeda comercial do 73,3%.

As facturas que quedan pendentes de pago a día de hoxe no Concello de Mos corresponden a 7 proveedores municipais, tratándose na súa maioría pagos correspondentes a certificacións de obra.

“Outro dato que valoro de xeito moi positivo”, concluiu Arévalo, “é que reducimos moito o período medio de pago a proveedores (PMP), actualmente estamos a pagar nun prazo de 33 días, con tan só 3 días de diferencia cos 30 días que marca o Ministerio para cumprir co PMP. Melloramos polo tanto en case 40 días o prazo de pago que manexabamos no trimestre anterior e que era dunha media de 71.36 días”. “En definitiva, o equipo de goberno local mosense e eu como alcaldesa estamos moi orgullosos de estar reconducindo a situación e, a pesar desta crise sanitaria do COVID-19 que estalle a xerar gastos imprevistos ás arcas municipais, aínda así estase a facer unha importantísima contención de gasto que nos permite dar estes datos tan positivos que melloran incluso as nosas previsións”, apuntou a alcaldesa.