A crise sanitaria do Coronavirus trouxo consigo a incerteza sobre a economía, pero tamén o nacemento de proxectos que levaban tempo forxándose e que pese a esta situación conseguiron ver a luz. Foi o caso de Daouda Sene, un home nacido en Senegal e emigrante primeiro en Francia e logo en España, quen, tras varios anos traballando e formándose, finalmente conseguiu abrir a súa propia pastelaría con obradoiro e vender os seus productos artesanais en Vigo. A súa é unha historia de esforzo e superación.

Sene é un apaixonado pola repostaría e xa no seu país comezou a formarse no sector. Tras emigrar a Europa, e sempre co obxectivo en mente de abrir a súa propia pastelaría, primero preparou e superou as probas da E.S.O., que lle deron acceso ao ciclo de Formación Profesional de Panadaría. Adquiriu experiencia traballando en diferentes empresas de Vigo como panadeiro e pasteleiro, e pouco despois decidiu que era o momento de intentar abrir o seu propio negocio.

A través do director da oficina de Caixabank de Travesía de Vigo coñeceu o programa de Autoemprego Incorpora de Fundación ”la Caixa”, cuxa responsable en Galicia é a técnica da Fundación Érguete-Integración Marta Alonso. Así foi como Daouda Sene, coa súa idea de negocio moi clara, acudiu en xuño de 2019 a este servizo en busca de asesoramento para facer o estudo de viabilidade e para conseguir a financiación inicial para a súa posta en marcha.

Sobre este proceso, a técnica explica que durante o acompañamento e asesoramento a Daouda Sene valoraron “diferentes posibilidades ata dar co negocio que cumpría con todos os requisitos”. Así foi como conseguiron o “traspaso dunha panadaría que estaba en pleno funcionamento por xubilación dos donos”.

O proxecto para solicitar a financiación foi presentado a Microbank a semana antes da declaración do estado de alarma e foi aprobada en pleno confinamento. Desta forma, “aínda que con moita dificultade”, recoñece a técnica, realizaron todos os trámites para o traspaso de negocio e o 20 de abril Daouda Sene fíxose cargo do mesmo.
O empresario recoñece que ter o seu propio negocio é “moi duro” porque supón moito “traballo e responsabilidade”, pero asegura que lle produce “un sentimento de satisfacción persoal por ter logrado un soño que tiña dende fai moito tempo”. “A miña xornada de traballo é moi longa pero desfruto coa miña paixón, que é a pastelaría”, remarcou Sene, que xa ten contratada a unha dependenta.

“Con este programa cheguei a crer que os soños están para ser cumpridos”, asegura Daouda Sene sobre o programa Incorpora, antes de engadir que o que máis valora é “o apoio e acompañamento da técnica de autoemprego, a labor social e a oportunidade que se brinda ás persoas que están en risco de exclusión social”. “O programa de Autoemprego Incorpora é unha iniciativa moi boa que abre unha ventá a persoas ás que se lle pecharon moitas portas”, incidiu Sene, que conclúe que “este tipo de programas son moi útiles para a sociedade, xa que cambian a vida das persoas”.