A maleza invade os viais e camiños municipais das parroquias do Porriño, sendo en moitos puntos intransitables ademais de supoñer en moitos casos un evidente risco para a seguridade de peóns e condutores e agravar o perigo de incendio ás portas da tempada de alto risco.

Esta situación está a desatar aluvións de reclamacións dos veciños e veciñas do rural porriñés que demandan a inmediata intervención do  Concello.

Estes traballos de eliminación da maleza e limpeza de viais e de limpeza diaria parques infantís e xardíns foron adxudicados definitivamente, por acordo plenario do pasado 27 de maio, á entidade  Urbaser sen que a día de hoxe o Goberno Municipal fixera efectiva a concesión.

"É inasumible e inxustificable que o Goberno Municipal continúe contratando a dedo para levar a cabo estes traballos á mesma empresa que á que se lle retirou a concesión por incumprir os pregos do contrato", denuncia o portavoz, Alejandro Lorenzo, "E ademais, de xeito evidente non se está prestando este servizo en condicións. Todas e cada unha das parroquias están totalmente abandonadas a pesar de que os veciños do rural pagamos este servizo cos nosos impostos".

Así, os populares reclaman ao  Concello que proceda de inmediato á limpeza e mantemento dos viais de todas as parroquias do municipio e a inmediata incorporación da empresa á que se lle adxudicaron estes servizos.