Uns 252 alumnos e alumnas de secundaria realizarán as probas de selectividade en Ponteareas. O alumnado dos centros de ensino secundario dos concellos da Cañiza, As Neves, Mondariz Balneario e Salvaterra achegaránse os vindeiros días 7, 8 e 9 de xullo para realizar xunto ao alumnado ponteareán as probas que lle permitirán acceder ao sistema universitario.

A directiva dos tres institutos de Ponteareas, IES do Barral, IES Pedra de Auga e IES Val do Tea, traballaron xunto á comisión delegada nº21 no deseño e na organización do desenvolvemento dos tres días de probas. Finalmente, a CIUG acordou que os exames se realizarán no ximnasio e  no salón de actos do Pedra de Auga e na aula de tecnoloxía, salón de actos e dúas aulas do IES Val do Tea. Nos accesos aos centros instalarase cartelería informativa na que se indique a que aula deben dirixirse.

Para eses días, a concellería de Educación contribuirá en todo o que os centros precisen para o correcto desenvolvemento das xornadas e contarán co apoio de voluntarios e voluntarias de Protección Civil sobre todo nos horarios de entrada.

Nestes días o alumnado será informado do centro no que deberá examinarse. Os centros educativos recordan a todas e a todos eles que deberán levar mascariña e respectar sempre as distancias de seguridade así como o resto das normas e recomendacións, tendo que acceder polos puntos de entrada e de saída que establecerán os centros para eses días.