Mentres que todos estábamos confinados na casa, con preocupación, medo e incertidume, houbo un grupo de voluntarios que fixeron un traballo igual de silencioso que de efectivo e foi gracias a isto que moitas persoas seguiron recibindo unha atención vital e imprescindible, que, sen esta axuda desinteresada, non sería posible.

Son un grupo de 27 homes e mulleres que "aparcaron" o medo, a familia ou mesmo a posibilidade de ser contaxiados, para prestar axuda aos máis vulnerables, dende persoas que necesitaban alimentos ata realizar desinfeccións ou traslados de pacientes COVID.

Un sinxelo acto celebrado no Pazo de Mos rendeulles o merecido recoñecemento en presencia dos membros da Corporación Municipal, Policía Local, Garda Civil,  Servizo Municipal de Emerxencias, Protección Civil e Mos Axuda. Foi un evento con aforo limitado, distancias social e tódalas medidas preventivas de seguridade ante o COVID-19.

Así con este acto homenaxe, de recoñecemento e agradecemento, aos colectivos que axudaron desinteresadamente ao Concello de Mos na crise sanitaria do COVID-19, perchábase unha atípica Festa da Rosa 2020.

“Estamos en débeda con eles"

A alcaldesa de Mos, Nidia Arévalo quixo destacar “o gran labor dos homenaxeados durante os momentos máis duros da crise sanitaria, entregándose por completo á causa, priorizándoa sobre as súas vidas persoais, sen pedir nin recibir nada a cambio máis que gratitude; e sendo o motor da gran cadea humana que integrou o operativo do COVID-19 en Mos”.

A rexedora municipal insistiu visiblemente emocionada en que “esta homenaxe é o mínimo que podemos facer para compensar o traballo altruista e desinteresado, a prol dos máis vulnerables do municipio pero tamén da poboación en xeral, destes homes e mulleres que estiveron durante tres meses ao pé do cañón ao carón do Concello, activos día e noite, tendéndolle a man aos demais”. “Estamos en débeda con eles e con este acto queremos demostrarlles o moito que valoramos o seu papel nesta crise sanitaria”, concluíu.

A concelleira de Cultura, Turismo e Política Social, Sara Cebreiro tamén tivo palabras de agradecemento para a improtante labor que fixeron dende Mos Axuda, colectivo que fixo chegar alimentos básicos e productos de primeira necesidade á poboación que por diferentes motivos non tiña acceso a eles durante o confinamento.

Leo Costas concelleiro responsable de Medio Ambiente e do Servico de Emerxencias tamén tivo palabras de agradecemento, tanto para o Coordinador do Servizo de Emerxencias coma para todos os voluntarios e voluntarias que integraron este servizo especial, no que houbo máis de 1.000 intervencións. Dixo estar "sorprendido" pola enorme capacidade de traballo destes voluntarios e pola súa labor.

O Xefe do Servizo Municipal de Emerxencias, Rodrigo Iglesias, moi emocionado, quixo tamén destacar o labor dos corpos e forzas de seguridade, Policía Local e Garda Civil cos que traballaron "codo con codo" en situacións moi difíciles e complicadas. Agradeceulle tamén a colaboración dos empregados municipais e os voluntarios de Protección Civil nestes tres duros meses.

Dende a Policía Local lembraron ao mesmo tempo a importante labor de Rodrigo Iglesias ao fronte do Servizo de Emerxencias alagando o seu traballo polifacético e de enorme valía "tanto para un roto coma para un descosido" sinalaba o portavoz da Policía no seu turno de palabra. O axente finalizaba a súa intervención cun xesto de agradecemento aos voluntarios "son boa xente" dixo.

Pola súa parte Santiago Iglesias, presidente da Agrupación de Voluntarios de Protección Civil de Mos, agradeceu o labor das voluntarias e voluntarios ao tempo que destacaba que "os verdadeiros heroes son os sanitarios". Iglesias tamén deixou claro que "isto inda non rematou" e fixo un chamamento a prudencia e a seguir as recomendacións sanitarias vixentes "para non volver atras".

Santiago Iglesias facía un chamamento a  ser prudentes "isto inda non rematou"

O finalizar o acto todos os homenaxeados, corpos de seguridade e membros da corporación fixeron unha foto de familia xunto aos vehículos de intervención na que quedou inmortalizado este importante día.