O Concello de Redondela vén de anunciar a posta en marcha dos campamentos de conciliación que baixo o nome ‘Verán con Simona’ desenvólvense de xeito totalmente gratuíto dentro do Programa Municipal de Conciliación que organiza a Concellería de Igualdade que xestiona a alcaldesa Digna Rivas.

Habitualmente, esta iniciativa realizábase durante o mes de agosto pero, as especiais necesidades de conciliación que teñen as familias este ano derivadas da crise sanitaria da COVID-19, fixeron que o Goberno que preside Digna Rivas decidira ampliar esta activade, polo que os campamentos terán lugar xa dende a segunda quincena de xullo e ata os catro primeiros días do mes de setembro.

Os campamentos de conciliación están dirixidos a nenos e nenas con idades comprendidas entre os 3 e 12 anos e realizarán as súas actividades entre as 9 h e 14 h divididos por grupos de idade e baixo medidas estritas de control sanitario para garantir, en todo momento, a seguridade dos pequenos e pequenas participantes.

Durante a última quincena do mes de xullo, o campamento de conciliación estará destinado a todos os nenos e nenas do municipio de Redondela. Xa no mes de agosto, a actividade estará dirixida, exclusivamente, aos rapaces e rapazas de calquera das parroquias agás Redondela, xa que estas nenas e nenos contarán, nese mes, coas actividades do Campamento Urbano de Verán, que cumpre a mesma función de conciliación familiar.

Prazos de inscrición
O prazo de inscrición para esta primeira quenda de mediados de xullo, está aberta xa e pecharase o vindeiro 9 de xullo; dita inscrición, totalmente gratuíta, pode formalizarse en calquera dos Rexistros Municipais autorizados, tendo sempre en conta que realízanse baixo o sistema de cita previa.

A inscrición para o mes de agosto, tanto para os campamentos de conciliación coma para o Campamento Urbano abrirase en breve e darase a coñecer oportunamente aos interesados e interesadas tanto na páxina do Concello de Redondela coma nas redes sociais do Concello.

Digna Rivas explicou que a data de comezo destes campamentos de conciliación “estaba a expensas da autorización da Xunta de Galicia, que non se tiña a certeza de para cando ía a ser. En canto se tivo esta autorización iniciouse un proceso que ten que cumprir prazos administrativos rigorosos, de aí, que non puideramos inicialos na primeira semana de xullo como era a nosa primeira intención”.

En todo caso, sinalou que coa celebración deste campamento de conciliación “ao que se engade no mes de agosto o Campamento Urbano, incrementamos o número de prazas e damos resposta á demanda que, en materia de conciliación, tiñan as familias de todo o municipio”, remata a alcaldesa de Redondela.