O Consorcio Provincial Contra Incendios e de Salvamento, adscrito á Deputación de Pontevedra e participado ao 50% pola Xunta de Galicia, celebrou este pasado  venres a primeira reunión da nova Comisión Xurídico-Técnica que se encargará do seguimento do proceso para o paso da xestión indirecta á xestión directa do servizo.

Dita Comisión, cuxa creación decidiuse no último pleno do Consorcio do mes de maio, encargarase da realización da memoria relativa aos aspectos sociais, xurídicos, técnicos e financeiros respecto ao novo modelo de xestión do servizo. Esta Memoria incluirá a descrición do Consorcio desde unha perspectiva funcional dos medios e efectivos que dispón; os aspectos xurídicos e técnicos para a subrogación dos traballadores/as e as necesidades da estrutura interna do persoal, amais do proceso de extinción do contrato coa empresa Matinsa que vence en 2021; e os relativos aos costes e aspectos financeiros do pase á xestión directa do servizo provincial.

A Comisión está integrada, por parte da Deputación de Pontevedra, polos deputados provinciais Carlos Font e Gregorio Agís, e por parte da Xunta polo Director/a de Emerxencias e Interior e o Director/a de Administración Local. A parte técnica da Comisión estará formada polo Secretario Xeral, o Interventor e a Xefa de Recursos Humanos da Deputación; e, no caso da Xunta de Galicia, polo Subdirector/a Xeral de Seguridade e Coordinación, o Subdirector/a de Planificación e Protección Civil e polo Xerente da Axencia Galega de Emerxencias.