A Xunta de Goberno da Deputación de Pontevedra aprobou as bases para a concesión de axudas a escolas de música dependentes de asociacións sen ánimo de lucro para este ano 2020. En total, a institución provincial destina 80.000 euros a esta iniciativa que ten por obxecto subvencionar os gastos correntes e de persoal necesarios durante este ano.

A presidenta provincial, Carmela Silva, informou de que estas achegas están destinadas a “apoiar a cultura e a música da provincia”. “Nós cremos, dixo, que a formación musical é fundamental na educación da mocidade. Polo tanto seguimos apostando pola educación que ten en conta ese valor cultural fundamental, que ten que formar parte da formación das nosas persoas mozas.

A concesión das subvencións farase en réxime de concorrencia competitiva tendo en conta o número de alumnas e alumnos matriculados no curso 2019-2020, o número de docentes, o orzamentos de gastos da escola e as especialidades impartidas.

As solicitudes presentaranse obrigatoriamente por vía electrónica a través dun formulario que estará dispoñible na sede electrónica da Deputación e o prazo abrirase ao día seguinte da publicación da convocatoria no BOPPO e rematará o 30 de setembro. No ano pasado beneficiáronse destas axudas un total de 17 escolas de música dos concellos de Gondomar, Lalín, Mos, As Neves, Ponteareas, Pontevedra, O Rosal, Salceda, Vigo, Vilaboa e Vilanova de Arousa.