A Deputación de Pontevedra ofrecerá a partir deste martes 29 de setembro a formación ao persoal dos vinte concellos de menos de 20.000 habitantes que recibirán 34 novos desfibriladores semiautomáticos (DESA) financiados coa axuda da institución provincial. Son un total de 43 persoas as que recibirán esta formación ata o vindeiro venres, no Edificio Administrativo e a sede de Turismo Rías Baixas, repartidas en catro quendas polas restricións de aforo da Covid-19.

Os 34 desfibriladores instalaranse nos municipios de Caldas de Reis, Meaño, Moaña, Vilanova, Cuntis, A Illa de Arousa, Sanxenxo, Silleda, Campo Lameiro, Forcarei, Fornelos de Montes, Gondomar, Oia, Ponte Caldelas, Pontecesures, O Porriño, Portas, O Rosal, Tomiño e Vila de Cruces. A Deputación entregará estes días os equipamentos aos concellos que, trala formación do seu persoal, os colocarán en edificios, instalacións, equipamentos ou outros espazos de titularidade municipal.

O investimento nesta dotación ascende a 78.000 euros, dos que a Deputación financia o 59,6% e os concellos o 40,4% restante. Este orzamento inclúe a subministración, instalación, posta en funcionamento e as labores de mantemento dos desfibriladores. Trátase da terceira adquisición que ten feito a institución provincial destes equipamentos e contando coas dúas anteriores son xa 103 os desfibriladores con que contan 41 municipios da provincia de menos de 20.000 habitantes.