A alcaldesa de Mos, Nidia Arévalo, e a concelleira mosense de Política Social e Igualdade, Sara Cebreiro, presentaron hoxe a programación municipal conmemorativa do 25N, Día Internacional contra a Violencia de Xénero, (enmarcada na campaña municipal co lema ‘Que a mascarilla non te cale’), que se celebra o vindeiro mércores e que este ano está condicionada pola nova normalidade e as circunstancias marcadas pola crise sanitaria da COVID-19.

Ante a recomendación de non celebrar actividades presenciais, evítanse os actos con público e no seu lugar organizouse unha iniciativa moi visual e fermosa: a idea é tinguir de cor violeta ou morado, a cor conmemorativa do 25N, todo Mos e para elo estanse a repartir globos desa cor para que todo o mundo decore as súas fachadas. O reparto está a facerse entre colexios, escolares dos colexios para que os coloquen nas súas casas, farmacias, comercios, outros negocios locais, edificios públicos municipais, zonas comerciais e urbanas, Escola Municipal de Música, campos de fútbol, etc.

Ademais comezaron esta semana nos Colexios de Mos charlas sobre igualdade. E o día 25 proxectarase en redes sociais a curta documental elaborada a raíz do curso ‘Namórate de ti’ e que versa sobre todo o proceso que implicou a realización deste curso por parte das 12 mulleres participantes. Esta curta documental, de entre 8 e 10 minutos de duración, foi grabada tamén por dúas mulleres.

Comezouse a rodar ao inicio do curso e aborda todo o procedemento de como lles cambia a perspectiva ás mulleres participantes tras haber levado a cabo esta acción formativa. A estrea do documental será, como se dixo, feita con motivo do Día Internacional contra a Violencia de Xénero.

O curso constou de sesións grupais de catro días realizadas os días, luns 7 de outubro, mércores 9, xoves 10 e venres 11, nas que as participantes compartiron unhas vivenzas enriquecedoras a través da cohesión grupal e a autoobservación.

Tratouse dun curso destinado a mulleres desempregadas, e/ou que precisaban voltar a confiar en sí mesmas, vítimas de violencia de xénero, en perigo de exclusión social… etc. Os obxectivos, mellorar a calidade de vida das mulleres, a través dos obradoiros, e potenciar as súas cualidades e capacidades. O obradoiro foi impartido por Tegra Gómez e Patricia Maquieira.

Pola súa banda a exposición ‘Namórate de ti’ permanecerá aberta ao público ata o vindeiro 30 de novembro no Pazo de Mos. Trátase dunha mostra fotográfica baseada no curso de autoestima e empoderamento a través da fotografía impartido a 12 mulleres.

Manifesto
Por  último, non podía faltar nun Día contra a Violencia de Xénero, o tradicional e necesario manifesto. O propio 25N ás 12.00 horas na Praza do Concello farase lectura do manifesto oficial do Concello de Mos con motivo do Día Internacional Contra a Violencia de Xénero.