A delegada territorial da Xunta de Galicia en Vigo, Marta Fernández-Tapias, deu conta da resolución das axudas para a conciliación da vida familiar e laboral por redución de xornada de traballo para persoas traballadoras e familias monoparentais que beneficiarán a 89 persoas -77 homes e 12 mulleres- co obxectivo de fomentar a corresponsabilidade nas tarefas e coidado de menores no ámbito doméstico.

Segundo informou, as axudas contan cun orzamento de 107.445 euros na área territorial de Vigo, cofinanciados polo Fondo Social Europeo (FSE). Teñen como finalidade apoiar a asunción de responsabilidades familiares por parte dos homes e contribuír á desaparición de estereotipos sobre a mellor ou menor disposición de mulleres e homes para asumiren as tarefas do coidado dos e das menores. Co apoio económico a aqueles traballadores que se acollan a esta medida de conciliación se facilita a permanencia no mercado de traballo das mulleres con cargas familiares.

Fernández-Tapias fixo especial fincapé en que a convocatoria deste ano tivo en conta as situacións laborais adversas derivadas da covid-19, e que a contía das axudas determínase en función da porcentaxe da redución da xornada e a súa duración así como do número de fillos e fillas a cargo da persoa solicitante. Deste modo, indicou as contías oscilan entre os 1.700 euros e os 3.700 para o caso de que se refiran ao máximo do período subvencionable de oito meses. En supostos de menor duración, prorratéanse de xeito proporcional.

 

Segundo informou, a área de Vigo beneficiase de axudas por importe de 107.445 euros con contías que oscilan entre os 1.700 e os 3.700 euros por un tempo máximo subvencionable de oito meses

 

En canto ao perfil dos beneficiarios, a representante autonómica aclarou que son homes ou familias monoparentais que optaron pola redución da xornada entre o 1 de xullo de 2019 e o 30 de xuño de 2020 e que teñen ao seu coidado unha filla ou fillo menor de 3 anos, ou menor de 12 anos naqueles casos nos que padeza unha discapacidade igual ou superior ao 33%.

Asemade, sinalou Fernández-Tapias as axudas tamén recaen en persoas que adoptaron un neno ou nena ou que prestan acollemento familiar permanente ou preadoptivo. Nestes supostos, non pode ter transcorrido máis de 3 anos desde a data da decisión administrativa ou xudicial pola cal se constitúe a adopción. En calquera caso, a filla ou fillo deberá ser menor de 12 anos.

Por último, a delegada recordou que estas medidas teñen por obxectivo o fomento da corresponsabilidade nos fogares galegos: que se leve a cabo nas familias un reparto equilibrado no tempo do coidado dos fillos e das fillas e da responsabilidade de conciliar que, na maioría dos casos, segue a recaer maioritariamente nas mulleres.

O impulso das medidas de conciliación para fomentar a corresponsabilidade por parte dos homes é unha das prioridades do VII Plan estratéxico de Galicia para a igualdade de mulleres e homes 2017-2020 e tamén se reflicte nas medidas recollidas no Plan galego de conciliación e corresponsabilidade 2018-2021.