O novo Seat León obtén cinco estrelas euro NCAP

O novo SEAT León obtivo cinco estrelas, a máxima puntuación, nas probas de seguridade Euro NCAP. O obxectivo da marca era crear un dos vehículos máis seguros do mercado e estes resultados poñen de manifesto que o conseguiu, especialmente se se ten en conta que os métodos das esixentes probas endurecéronse aínda máis en 2020.

Un dos cambios fundamentais que se incorporaron este ano é a barreira móbil na proba de choque frontal co coche en movemento, en substitución da proba anterior con barreira estática deformable. Esta proba axuda a avaliar a protección dos ocupantes dentro do habitáculo e a coñecer en que grao contribúe a iso a parte frontal da estrutura do coche.

Pero esta non é a única modificación relevante dos novos ‘ crash test’. Os impactos laterais actualizáronse para incluír axustes na velocidade e a masa na proba de choque lateral con barreira no lado do condutor, o que aumenta o nivel de esixencia da proba. E, por primeira vez, Euro NCAP avalía os impactos laterais no lado dereito do vehículo, centrándose non só na protección do condutor senón na súa posible interacción co acompañante do asento dianteiro.