A Fundación Carlos Casares abre a exposición “Sorrisos por un mundo. O humor en Carlos Casares”. A mostra poderá visitarse ata o 22 de xaneiro na sala de exposicións da Delegación Territorial da Xunta en Vigo (Concepción Arenal 8, baixo) en horario de apertura do edificio ao público e está destinada a todos os públicos. A exposición enmárcase dentro das actividades anuais que se desenvolven no Concello de Vigo, coa colaboración da Deputación de Pontevedra e a Xunta de Galicia.

A EXPOSICIÓN

O humor é unha das mellores capacidades evolutivas do ser humano. Para algúns autores é a maior mostra de intelixencia que existe. Serve de axuda nos momentos difíciles e comprometidos, resulta beneficioso para a saúde e nos permite aprender e ensinar valiosas leccións. Coa exposición “Sorrisos por un mundo. Carlos Casares e o humor”, a Fundación Carlos Casares pretende explicar os distintos aspectos do humor, e achegarnos ás interpretacións e usos que adoitamos darlle en Galicia, así como noutras partes do mundo.

De maneira explícita, a mostra afonda tamén sobre o tratamento do humor na vida e na obra de Carlos Casares. Sabemos que o escritor posuía un fino sentido do humor; notámolo facilmente nos seus contos infantís, na súas novelas e relatos e, sobre todo, nos comentarios que verquía na súa columna “Á marxe” de La Voz de Galicia. É un humor sinxelo que nace da intelixencia e da paixón polo ser humano, polo gusto de contar historias, que envolvía coa fina retranca da oralidade daquel xeito que tan ben se lle daba.

A mostra inclúe tamén unha serie de caricaturas do escritor e fotografías onde o escritor aparece en situacións cómicas. Unha exposición para botar un sorriso cómplice en tempos de Nadal.