O "carteiro" Anselmo achégase neste programa a Pontedeume, un concello emblema do río Eume que foi fundado por carta puebla por Alfonso X O Sabio. Para o seu percorrido polo concello, contará , coma sempre, coa axuda dunha cicerone, Carmen Blanco, unha avogada convertida a actriz que ademais rexenta un establecemento moi curioso, a taberna de Caaveiro. Ela mesma lle dará a as indicacións dos sitios que pode visitar: a torre dos Andrade, unha das familias de nobres máis importantes de Galicia, a Peña Ciclista Leboreira e un recuncho inédito para os que non son da vila, a praia de Jajuai.

O broche de ouro do programa correrá a cargo de Carmen que, cunha reinvención da queimada popular galega, se gaña a banda de embaixadora. “Sen código postal” é unha nova produción que conta cun vello coñecido da TVG, Anselmo, o carteiro de Luar, que agora é o carteiro da TVG. Anselmo é un tipo peculiar e simpático, que sempre vai coa súa bicicleta, a súa carteira amarela e a súa peculiar gorra con anteollos. Agora está de volta para percorrer Galicia e levar unha carta a un veciño para que lle ensine os recunchos da súa vila e se gañe con iso o recoñecemento de embaixador.

O programa permitirá facer un paseo pola nosa terra visitando os lugares e conveciños máis descoñecidos, os máis simpáticos, os máis característicos e os máis sorprendentes, sempre ao xuízo das lembranzas e vivencias dos nosos cicerones. O humor estará presente en cada un dos episodios e as bromas entre o presentador e os convidados marcarán o ritmo distendido deste novo programa que permitirá coñecer os recunchos menos explorados de Galicia.