As tres forzas políticas PP, PSOE e BNG  con representación no Pleno da Corporación de Salvaterra de Miño, mostran o seu pesar pola triste noticia da morte de tres veciños do municipio a causa dun fatídico accidente de tráfico, e trasladan as súas condolencias e todo o seu apoio á familia.

Ademais acordase decretar dous días de luto oficial, os días 20 e 21 deste mes, en todo o termo municipal, durante os cales, as bandeiras ondearán a media asta en tódolos edificios municipais.

Tres persoas, dúas adultas e un menor, perderon a vida a pasada noite despois de que batesen dous coches no punto quilométrico 6 da PO-510. Ademais, outra persoa resultou ferida de gravidade no sinistro.

Segundo confirmaron os Bombeiros do Baixo Miño ao 112 Galicia, os membros do Servizo de Prevención, Extinción de Incendios e Salvamento empregaron o material de excarceración para liberar a tres persoas atrapadas, dúas nun vehículo e unha no outro coche implicado.

O 112 Galicia tivo coñecemento do accidente ás 22:00 horas e, axiña, desde o CIAE 112 Galicia solicitouse a intervención de Urxencias Sanitarias de Galicia-061, dos Bombeiros do Baixo Miño, dos axentes da Garda Civil de Tráfico e da Policía Local e da Agrupación de Voluntarios de Protección Civil de Salceda de Caselas. Tamén, o persoal de Emerxencias 112 Galicia informou do sinistro ao Grupo de Intervención Psicolóxica en Catástrofes e Emerxencias (GIPCE).

A pesar dos esforzos, os servizos de emerxencia nada puideron facer por salvarlle a vida ás tres vítimas. Por outra banda, a persoa que resultou ferida de gravidade foi trasladada ao Hospital Álvaro Cunqueiro.