A alcaldesa de Mos, Nidia Arévalo, e o tenente alcalde e concelleiro de Vías e Obras, Camilo Augusto, informaron da aprobación en Xunta de Goberno Local o Plan de Obras e Servizos (Plan Concellos) 2021 e a aceptación das bases da convocatoria na súa totalidade.

Dentro deste Plan de Obras o Concello de Mos acometerá traballos de ampliación da rede de saneamento, de mellora da seguridade viaria en varios camiños municipais e de continuación da Humanización de Cela.

O orzamento total dos proxectos ascende a 725.112,36 euros.

Deste xeito a administración local mosense adheriuse á Liña 1 desta convocatoria para a inclusión de obras e saneamentos que son necesarios para mellorar os viais e servizos de saneamento do Concello de Mos.

Así, na sesión ordinaria da Xunta de Goberno Local celebrada o venres procedeuse á aprobación e solicitude dentro da Liña 1 de investimentos dunha subvención por importe de 137.866,65 euros co obxecto do financiamento do proxecto de ampliación da rede de saneamento integral do Concellos de Mos, nas parroquias de Sanguiñeda e Petelos, proxecto que tamén foi aprobado pola Xunta de Goberno.

A instalación de rede de saneamento na parroquia de Petelos acometerase no camiño do Cocho, camiño da Fontiña e camiño da Garabulla. As obras consisten na canalización das diferentes tuberías de PVC destinadas á rede de saneamento incluíndo todas as operacións complementarias: excavacións, pozos, reposicións, etc.

Na parroquia de Sanguiñeda beneficiarase da ampliación da rede de saneamento municipal o barrio de Amieirolongo. As obras consisten no bombeo e impulsión para dar saída á rede de saneamento existente e así completar dita rede e permitir que chegue ata un pozo en funcionamento. A canalización da impulsión realizarase mediante tubería de descarga común incluíndo todas as actuacións complementarias a esta: excavación de zanxa e reposicións.

Levarase a cabo a execución de 1.342,60 m de saneamento por gravidade en Petelos e 205,00 metros de impulsión en Sanguiñeda.

Por outra banda, e dentro da mesma Liña, aprobouse tamén  subvención por importe de 435.801,90 euros co obxecto do financiamento do proxecto de humanización da estrada Generoso Domínguez desde o Camiño da Quinta ata a Igrexa de San Pedro de Cela; así como a aprobación do devandito proxecto.

O Concello de Mos cre necesario mellorar a seguridade do vial e humanizar a contorna na que é a segunda fase da Humanización de Cela (a primeira é entre a PO-331 e o Camiño da Quinta). Esta segunda fase inclúe a execución dunha nova beirarrúa na marxe esquerda (parte Norte do vial). Esta beirarrúa aumenta o ancho actual, duns 5 m, a 10 m previstos no plan. Con isto, conséguese non só aumentar a seguridade dos peóns, senón mellorar nalgúns puntos o trazado viario, e por tanto a seguridade do tramo. A actuación compleméntase cos muros e movementos de terra necesarios para ampliar a sección, e tamén con obras complementarias, como o deseño de nova iluminación eficiente, a adaptación da drenaxe, o soterramento das redes de servizo aéreas, a mellora da sinalización ou redutores físicos de velocidade, entre outras.

E por último  procedeuse tamén á aprobación e solicitude dentro da Liña 1 dunha subvención por importe de 151.443,79 euros co obxecto do financiamento do proxecto de mellora na seguridade viaria de 2 camiños do Concello de Mos (Camiño Estrada Real Petelos-Sanguiñeda e Camiño de Cabezal en Torroso) así como a aprobación do documento redactado do proxecto.

A mellora da pavimentacion do Camiño de Cabezal, cunha lonxitude de 850 metros, comprenderá actuacións previas que inclúen o desbrozado lateral, limpeza de cunetas e noiros. E rehabilitación de firmes e pavimentos mediante regularización da capa de rodadura coa aplicación de 1 cm de asfalto que regularice as zonas que presentan unha maior fisuración do asfalto.

A mellora da seguridade viaria en Estrada Real, parroquias de Petelos e Sanguiñeda, cunha lonxitude de 1408 metros, comprenderá actuacións previas que inclúen o desbrozado lateral, limpeza de cunetas e noiros. E rehabilitación de firmes e pavimentos mediante regularización da capa de rodadura coa aplicación de 1 cm de asfalto que regularice as zonas que presentan unha maior fisuración do asfalto.

“Deste xeito pretendemos completar próximamente o 100% da rede de saneamento integral do Concello de Mos e cos proxectos de humanización e asfaltado incrementar a seguridade viaria tanto para os veciños e veciñas das zonas beneficiarias como para os viandantes e conductores que transiten polas mesmas”, declararon os representantes municipais Arévalo e Augusto, “continuando ademais co compromiso do goberno local de manter en óptimas condicións as estradas e camiños do Concello en aras de preservar a seguridade de condutores e peóns”.