Co período de exames do segundo cuadrimestre a piques de comezar, a Biblioteca Universitaria inicia este sábado, 8 de maio, a programación extraordinaria de apertura de catro das súas instalacións durante as próximas fins de semana e festivos.

Esta ampliación de horarios depende dos calendarios de exames dos centros en cada campus, en particular os correspondentes á convocatoria de xullo, polo que o remate desta programación de aperturas de fin de semana producirase o domingo 11 de xullo nas bibliotecas centrais dos campus de Ourense e Pontevedra, e o domingo 18 de xullo na Central de Vigo e na de Torrecedeira.

Medidas extraordinarias de uso
Durante estas fins de semana o acceso ás bibliotecas segue sometido a restricións da capacidade máxima e ás mesmas normas de seguridade que nos horarios ordinarios, en especial a obrigatoriedade de levar máscara para acceder e permanecer nas instalación e facer uso individual dos postos, sempre cunha separación non inferior a 1,5 metros en cada un dos seus catro lados. Como consecuencia, a capacidade das salas está reducida ao 50%, polo que dende a Biblioteca Universitaria recomendan consultar a páxina web para informarse sobre a dispoñibilidade de postos de estudo nas catro bibliotecas en tempo real.

 

Estarán dispoñibles nas fins de semana dende mañá sábado ata xullo

 

Por outra banda, lembran tamén que as persoas alleas á comunidade universitaria que queiran acceder a estas instalacións precisan contar cun carné de usuario/a externo/a da Biblioteca Universitaria en vigor. Ademais, para artellar a prioridade de uso dos postos de estudo polos membros da Universidade de Vigo, o seu uso por parte das persoas externas supedítase a que cando a metade dos postos que ofrece unha biblioteca estean ocupados (ou en situación de "non dispoñibles"), poderase restrinxir o acceso aos usuarios/as externos/as. Na biblioteca de Torrecedeira o servizo restrínxese ao estudantado da Universidade de Vigo, de xeito que non se permite a entrada ao público alleo.

Horarios de fin de semana
Atendendo a este novo calendario de apertura, a Biblioteca Central de Vigo e a de Torrecedeira estarán abertas de 09.00 horas a 21.00 h. todas as fins de semana desde o sábado 8 de maio ata o domingo 18 de xullo ademais do 17 de maio, Día das Letras Galegas. No caso das bibliotecas centrais de Ourense e Pontevedra, o horario será tamén de 09.00 a 21.00 h. todas as fins de semana desde o sábado 8 de maio ao domingo 11 de xullo, incluíndo o 17 de maio.

Durante estes horarios de fin de semana as bibliotecas só prestan un servizo de espazo de estudo e de consulta de materiais bibliográficos de libre acceso, pero non outros servizos ordinarios como préstamo, préstamo interbibliotecario, acceso a recursos electrónicos, etc.

No que se refire ao horario habitual destas instalacións de luns a venres, as bibliotecas centrais dos tres campus, xunto coa de Torrecedeira, están abertas de 08.30h a 21.00 horas. O resto das instalacións, localizadas nas escolas e facultades están dispoñibles de 08.30 a 20.45 horas.