O Consello da Xunta coñeceu  esta semana o informe sobre as actuacións de seguridade,  accesibilidade e integración paisaxística nos Camiños de Santiago, que supoñen o investimento autonómico global de 17,5 millóns de euros.

A seguridade viaria en cruzamentos ou treitos paralelos dos Camiños de Santiago na rede autonómica de estradas é un dos eixos prioritarios desta liña de acción. Así, o Goberno galego prevé a execución de 70 actuacións deste tipo neste mesmo ano 2021, cun orzamento que ascende a 1,42 M€.

Entre estas intervencións cabe salientar exemplos relevantes como a senda proxectada entre os puntos quilométricos 6+810 e 8+110 da estrada LU-530. Trátase dun tramo de 1.300 metros nesta vía onde o Camiño Primitivo transcorre paralelo entre as localidades de Carballido e Manzoi, no concello de Lugo.

Outro exemplo destas actuación é a execución dun paso elevado de peóns e o reforzo de sinalización no cruzamento entre o Camiño Portugués e a estrada AC-301, en Padrón.

A Xunta tamén ten prevista a execución dunha senda nun tramo duns 650 metros sen beirarrúas na estrada OU-112 no concello de Laza, onde o Camiño de Santiago transcorre paralelo.

Obras executadas

O informe hoxe presentado detalla as actuacións de mellora da seguridade viaria ou da accesibilidade xa acometidas nas estradas autonómicas nos últimos anos, coa achega dun orzamento de 3,52 M€ por parte do Goberno galego.

Cabe destacar intervencións como a efectuada no Camiño Francés na estrada LU-633 en Pedrafita, Triacastela ou Portomarín. Neste caso, realizouse unha ampliación da senda entre os puntos quilométricos 10+330 e 10+395, á saída de Hospital; entre o 27+610 e o 28+550, á saída de Triacastela; e entre 28+900 e 31+100, en Samos.

Tamén se acondicionou un antigo treito en curva da LU-633, na traza do Camiño Francés en Triacastela e xusto á saída da capital do concello, con destino a uso público.

 

Exemplos destas obras son a nova senda na LU-530, no Camiño Primitivo, ou un paso elevado de peóns no cruzamento entre o Camiño Portugués e a AC-301 en Padrón

 

Nesta mesma estrada tamén se acometeu unha senda desde o punto quilométrico 72+320 ao 72+580, así como a renovación das beirarrúas e o acondicionamento da ponte de Portomarín.

A Xunta tamén levou a cabo unha intervención significativa no Camiño Portugués, na PO-225 en Alba, en Pontevedra, coa mobilización dunha achega de máis de 525.000 euros. As obras consistiron na construción dunha senda peonil que reforza a seguridade neste tramo e na execución dunha pasarela sobre o río Cortes.

A Consellería de Infraestruturas e Mobilidade tamén executou outros proxectos como a mellora da seguridade na estrada AC-934, no tramo coincidente co Camiño do Norte; na OU-105, en Seixalbo; e vai actuar na AC-214 en Sigrás, ao paso do Camiño Inglés.

Entradas dos Camiños en Compostela

Ademais a Xunta tamén está a rematar as actuacións de mellora das entradas das Rutas Xacobeas en Santiago de Compostela. Trátase dos accesos do Camiño Francés (Monte do Gozo - San Lázaro e Fonte dos Concheiros- Cruce de Concheiros); do Camiño Inglés (Polígono do Tambre) e do Camiño Portugués (Conxo), cun investimento total de 12,61 M€.

No que se refire ao trazado do Camiño Inglés, na súa entrada en Compostela atravesa o polígono do Tambre polas rúas Galileo e das Mulas, na que se atopa o cemiterio de Boisaca. Ademais, como extensión do ámbito inicialmente previsto, ampliouse en ambos os extremos a actuación, na rúa das Mulas ata o tanatorio de Boisaca e na rúa Garabal, para reinstalación dos aparcadoiros executados para compensar as prazas eliminadas no paso do Camiño.