O goberno da Deputación de Pontevedra vén de aprobar a concesión da liña de subvencións destinadas ao fomento de actividades culturais que este ano beneficiarán a 144 entidades de 42 concellos da provincia cun investimento de 250.000 €. Serán 17 entidades máis que o pasado ano.

Estas achegas servirán para contribuír a difundir, manter e recuperar a cultura e tradicións da provincia, poñendo en valor o patrimonio inmaterial propio das vilas e comarcas, ben sexan costumes, tradicións, etnografía, crenzas ou mitos. Tamén para desenvolver festivais, mostras, encontros e certames culturais, así como certames e actividades de posta en valor da pintura, escultura, arquitectura e banda deseñada ou para intercambios culturais para potenciar o patrimonio musical fóra de Galicia.

A comarca de Vigo, con 50 entidades beneficiadas de Vigo, Gondomar, Baiona, Redondela, Salceda, Mos, Nigrán e O Porriño, recibirá 100.000 € para a posta en marcha de festivais internacionais e folclóricos, festas do/a socio/a, semanas e ciclos culturais, xornadas micolóxicas, xornadas de videoxogos e literatura, festivais de corais e folclóricos, certames de bandas, festivais de curtametraxes, exposicións, maratóns fotográficos, encontros de pandeireta, concertos, teatro, certames de humor, rodaxes de curtas, murais artísticos, festivais de danza moderna, concursos de canto e percusión tradicional, certames culturais, encontros de poesía, mesas de debates, actividades de cinema na rúa ou certames internacionais de regueifas.

19 entidades do Morrazo (Cangas, Bueu e Moaña) recibirán 24.000 € para xornadas de cinema, enxalzar as alfombras florais como manifestacións de arte efémera, para certames de música e festivais musicais e folclóricos, xornadas sobre o patrimonio galaico-portugués, exposicións filatélicas, concertos e xornadas de exaltación da arte galega, mostras etnográficas, feiras tradicionais de artesanía e galas conmemorativas.

As comarcas do Salnés e Caldas, con 18 entidades beneficiadas de Vilagarcía, Cambados, Sanxenxo, Cuntis, Moraña, Valga, A Illa de Arousa, Meaño e Portas, recibirán máis de 38.000 € para poñer en marcha festivais musicais e de bandas de música, semanas de cine, encontros folk, festivais de recuperación dos muíños, actividades de Nadal, contos mariñeiros , magostos, ciclos de música antiga, xornadas e actos culturais, xornadas de historia, actividades de malabares, festexos temáticos, intercambios culturais, representar unha aldea galega ou a feira da muller rural.

Ata 17 entidades da comarca de Pontevedra (Pontevedra, Ponte Caldelas, Poio, A Lama, Marín e Vilaboa) beneficiaranse de 32.000 € para percorridos polo Río da Vida de Manuel Moldes, roteiros de traxes tradicionais, proxectos etnográficos, exposicións, festivais musicais, feiras de educación e formación, encontros relacionados co camiño de Santiago, feiras de artesanía, xornadas de coeducación, recuperacións de roteiros, xornadas de homenaxe ás mulleres e homes do mar e festivais artísticos.

As comarcas de Deza e Terra de Montes recibirán 25.300 € para 17 entidades de Lalín, Silleda, A Estrada, Cerdedo-Cotobade, Vila de Cruces, Agolada e Forcarei, que poderán poñer en marcha xornadas antropolóxicas e arqueolóxicas, exposicións temporais e xornadas musicais, festivais musicais e de bandas de música e encontros tradicionais.

Do Baixo Miño serán 11 as asociacións de Oia, Tui, A Guarda, Tomiño e O Rosal que se beneficiarán de 17.000 € para certames de corais, festivais musicais, semanas culturais, mostras musicais, certames de gaitas, desfiles folclóricos e de bandas mariñeiras ou exposicións de pintura. E, finalmente, do Condado e da Paradanta serán 8 as entidades de Mondariz, Ponteareas, Arbo e Salvaterra que recibirán 11.000 € para xornadas culturais, patrimonio fluvial, concertos, festivais folclóricos e magostos.