O presidente do Goberno galego, Alberto Núñez Feijóo, enxalzou hoxe a contribución da nova iluminación interior da Catedral de Santiago para celebrar un Ano Santo bienal cunha intensidade renovada, desde o seu epicentro máis emblemático.

Durante o acto de inauguración da iluminación ornamental interior, Feijóo aseverou que esta iniciativa transcende ao mero proxecto de iluminación, servindo ao propósito de recuperar o esplendor da Catedral de cara á este Xacobeo 21-22, así como á meta de velar pola súa impronta para as xeracións vindeiras.

Nesta liña, aproveitou o momento para agradecer á compañía Iberdrola o seu compromiso cunha das pezas icónicas do patrimonio galego, europeo e de Occidente, reformulando a iluminación integral do templo e do Pórtico da Gloria; a Ignacio Valero, responsable dos traballos de avaliación e instalación; e á Fundación Catedral, “polo seu traballo incansable velando polo tempo e por difundir toda a súa fenomenoloxía”.  

 

Destaca que este sistema -con novas lámpadas e emisores led- desenvolve todo o potencial estético do templo sen substituír á luz natural, baseándose en tres preceptos: compromiso pola sustentabilidade, respecto pola relixiosidade e desenvolvemento cultural

 

Ao longo da súa intervención, o titular da Xunta destacou que este sistema -con novas lámpadas e emisores led- desenvolve todo o potencial estético do templo sen substituír á luz natural, baseándose en tres preceptos: compromiso pola sustentabilidade, respecto pola relixiosidade e desenvolvemento cultural.

Feijóo recordou que cunhas obras que ascenden a case 24 millóns de euros, Galicia leva máis dunha década preparando á Catedral; “estamos a falar dun dos esforzos de conservación máis grandes da historia recente do noso país”, dixo, subliñando que en todo este tempo, ademais de acoller un concerto de persoas movidas pola fe e a fraternidade, foi tamén punto de encontro de talento e pericia técnica.

Este esforzo, asegurou, terá continuidade no Plan Catedrais 2021-2027 posto en marcha pola Administración autonómica para conservar as cinco grandes catedrais da Comunidade, a antiga catedral de San Martiño de Mondoñedo e as dúas concatedrais de Santa María de Vigo e de  San Xiao de Ferrol, co obxectivo de fortalecer o seu papel no escenario patrimonial de Galicia.

O responsable do Goberno galego concluíu afirmando que os peregrinos que, pouco a pouco, van chegando a Santiago ofrecen todos os motivos para dar o mellor de nós, sen esquecer as precaución que converten a Galicia nun destino seguro.