Dous feridos nunha colisión múltiple entre catro vehículos en Mos

Dúas persoas tiveron que ser evacuadas na tarde de hoxe logo de producirse unha colisión entre catro vehículos na A-55, ao seu paso polo concello pontevedrés de Mos.

Segundo a información facilitada ao 112 Galicia polas diversas persoas particulares que contactaron co centro de emerxencias ás 15:30 horas, catro vehículos chocaron cando circulaban á altura do punto quilométrico 10, próximo a unha gasolineira, sentido Vigo. De acordo co relato das testemuñas do suceso, malia que os ocupantes do turismo estaban liberados e accesibles, algúns deles necesitaban asistencia médica.

Decontado, os xestores do 112 puxeron os feitos en coñecemento dos profesionais de Urxencias Sanitarias de Galicia-061, dos Bombeiros do Porriño e do Servizo de Emerxencias de Mos.

Unha vez no lugar, os equipos de intervención confirmaron ao 112 que dúas persoas tiveron que ser evacuadas ao Hospital de Fátima. Así, para restablecer as condicións de seguridade na vía, ata o lugar desprazáronse os axentes da Garda Civil de Tráfico e o servizo de mantemento das estradas. Ademais, avisouse tamén á Policía Local.