Todo comezou cunha viaxe, a de Mateo Martínez, o propietario de Xorxios, a Brasil, viaxe que cambiou a súa vida. A súa familia en América estaba ligada ao mundo do café e quedou atrapado nesa rede. A partir dese momento a aprendizaxe de Mateo para coñecer todo o que ten que ver cun produto imprescindible para boa parte da humanidade foi contínua e constante.

Mateo viaxou, formouse e explorou territorios e produtores ata converterse nun importador e comercializador de cafés exclusivos para clientes selectos e exixentes. E comprobou que o café da moito de si se un quere experimentar.

A ferramenta diaria de traballo en Xorxios é a cata, desta forma seleccionan só os perfís sensoriales que son garantía de calidade. Catas que, de forma limitada, tamén se ofrecen no seu obradoiro de A Guarda a aquelas persoas que queiran vivir unha experiencia con recendo a café.

Coñecer en profundidade a complexidade de matices que alberga cada café permítelles ofrecer un asesoramento profesional e personalizado e adaptado ás necesidades de cada cliente.

Xorxios e Mateo forman parte da campaña Parte de ti, unha campaña do Grupo de Desenvolvemento (Galicia Suroeste Eurural) que por segundo ano vai enfocada a sensibilizar, concienciar e informar baseándose nas historias das produtoras e produtores do rural. Cada unha destas historias cóntase en forma de vídeo para achegar a realidade do rural ao espectador.

O Grupo de Desenvolvemento (Galicia Suroeste Eurural) é unha entidade sen ánimo de lucro formada por todo o tecido asociativo que hai nos concellos de Fornelos de Montes, Pazos de Borbén, Redondela, Mos, O Porriño, Tui, Tomiño, O Rosal, A Guarda, Oia, Baiona, Nigrán e Gondomar máis os propios concellos e entre todos encárganse de elaborar unha estratexia de desenvolvemento rural para todo o territorio.