A Xunta de Galicia considera prioritario manter a aposta pola adopción e polo acollemento familiar como medidas de protección para os nenos e os adolescentes. Así o asegurou esta mañá o director xeral de Familia, Infancia e Dinamización Demográfica, Jacobo Rey, durante a inauguración do 4º Congreso de Adopción e Acollemento, organizado pola entidade Manaia no Pazo da Cultura de Pontevedra.

Proba desta aposta do Goberno galego, sinalou o director xeral de Familia, Infancia e Dinamización Demográfica, é que o número de menores que permanecen acollidos de xeito temporal de familias, tanto extensa como allea, é maior que o daqueles que están nun centro residencial. Por esta razón, sinalou Jacobo Rey, eventos como o que se está a celebrar na cidade do Lérez constitúen grandes oportunidades “para poder abrir novos puntos de vista e visualizar a realidade deste proceso”.

 

Durante o acto de apertura do evento, organizado pola asociación Manaia, o representante do departamento autonómico sinalou que mais da metade dos menores en réxime de protección en Galicia permanecen en familias, en lugar de en centros

 

 
Ampla rede de familias acolledoras
Galicia, engadeu, é unha Comunidade que conta cunha ampla rede de familias acolledoras que ofrecen un fogar aos menores en réxime de protección, polo que o compromiso da Xunta de Galicia pasa por seguir traballando coas familias e as entidades para mellorar esta alternativa aos centros residenciais.

Os datos oficiais correspondentes ao ano 2020 revelan que existen en Galicia preto de 1.200 familias acolledoras, entre familia extensa e familia allea. O director xeral apuntou que o Goberno galego traballa por garantir que o dereito a unha infancia feliz sexa unha realidade para o 100% das nenas e nenos de Galicia. Neste sentido, concretou que o obxectivo central da Administración é que convivan no mellor entorno posible para cada un deles.