O proxecto “CinemAldea”, impulsado polo Festival de Cans e a Concellería de Cultura do Concello do Porriño para achegar o cinema ás zonas rurais, segue esta fin de semana o seu percorrido. Este sábado 23 de outubro, chegará a Asociación Cultural Mosteiro en Budiño ás 20,00 horas, e o domingo 24 á Asociación de Veciños Castelo de Cans, ás 19,30 horas. A entrada é gratuita, pero é preciso a inscrición previa nos respectivos centros culturais desde media hora antes, ata completar o aforo permitido.

“CinemAldea” segue o seu periplo, depois de comezar con éxito de público a pasada fin de semana, na Asociación Os Penediños de Atios, e nas asociacións A Forna e Chan-Casal de Budiño.

Unha das premisas de “Cinemaldea”, ademáis de achegar o cinema ás zonas rurais sen acceso habitual ó cine, é promover nas vindeiras sesións o encontro de creadoras e creadores, e equipos das curtametraxes, co público asistente.

Este domingo en Cans terá lugar o primeiro destes encontros, coa presenza do cineasta de O Rosal Gon Caride, director da curta “Deux Options”, que acadou na última edición do Festival de Cans os Premios do Xurado ó Mellor Guión e á mellor interpretación masculina para os actores Jan Soja e Noël Faure. Caride estará en Cans para falar co público da realización desta curtametraxe sobre o racismo, a inmigración e a solidariedade. A obra está a ter un impresionante percorrido internacional. Leva máis de 60 seleccións en festivais de diversos países do mundo, desde Estados Unidos a Xapón, pasando por Francia, Alemaña, Arxentina ou Canadá, e foi recoñecida con dez premios internacionais.