A Comunidade de Montes de Tameiga explica que "quere fomentar as iniciativas emprendedoras da veciñanza da parroquia". Para acadar isto, constituiron un viveiro de empresas radicado nunha das grandes instalacións industriais do polígono Monte Faquiña. Nestas instalacións aseguran que "ofreceranse unhas condicións especiais para que estos proxectos empresariais veciñais poidan madurar. Espazo a medida, aluguer reducido e até electricidade a baixo coste grazas as plantas fotovoltaicas instaladas pola comunidade de montes nos tellados de varias naves industriais".

Este proxecto será presentado e explicado con detalle na nova xuntanza do “Comité Consultivo de Monte Faquiña” que se celebrará este venres 29 de outubro no auditorio do centro social As Pedriñas en Tameiga. O comité consultivo "está formado por representantes das empresas aloxadas no polígono, da veciñanza de Tameiga e das administracións local e provincial e ten como obxectivo recoller as propostas para mellorar o polígono e adecualo ás necesidades tanto das empresas usuarias sen prexuizo da calidade de vida da veciñanza aledaña" explican no comunicado.

Ademais desde a Comunidade de Montes de Tameiga anuncian que hai dúas novas empresas relacionadas coa alimentación instaladas no polígono industrial de Monte Faquiña e que ambos proxectos industriais conlevarán importantes inversións e a creación de postos de traballo.

Montes de tameiga asegura traballar "para acadar unha ocupación total do polígono e obter así o máximo rendimento"

Sinalan que nestes momentos acadouse a taxa máis alta de ocupación e actividade na historia do polígono de Monte Faquiña. Aínda así dende a xunta reitora da comunidade indican que seguen traballando para acadar unha ocupación total do polígono e obter así o máximo rendimento, xa que lembran os rendimentos deste polígono redundan nunha maior obra social e cultural da comunidade.

“Estamos en contacto con dúas grandes empresas para que se instalen no parque industrial de Monte Faquiña e agardamos pronto frutifiquen as negociacións. Hai máis peticións para instalarse no noso polígono, pero buscamos empresas que non impliquen unha perda da calidade de vida da veciñanza porque xeren excesivo tráfico pesado ou contaminación” explica César Lago, presidente da Comunidade de Montes de Tameiga.