O Consello da Xunta autorizou hoxe a licitación dos contratos para o desenvolvemento do Plan de control de vertidos na Demarcación Hidrográfica Galicia-Costa nos dous vindeiros anos, que suporá un investimento de máis de 6 millóns de euros, tendo en conta que se prevé a posibilidade de prorrogar os contratos por 3 anos máis.

A autorización dálle continuidade ao Plan de control de vertidos que vén desenvolvendo a Xunta, a través de Augas de Galicia, para realizar o seguimento das masas de auga de competencia autonómica e garantir a súa calidade.

Este programa levarase a cabo mediante 3 contratos, un por cada ámbito territorial da Demarcación Hidrográfica Galicia-Costa: norte, centro e sur.

Neste sentido, a zona norte abrangue a contorna dos ríos Grande, Mero, Mandeo, Eume, Sor, Landro, Ouro e Masma, e polo tanto, tamén as rías de Camariñas, Betanzos, Ares, Ferrol, Ortigueira, Cedeira, Viveiro ou Ribadeo.

A zona centro engloba as áreas dos ríos Ulla, Tambre, Xallas e do Castro, así como as das rías de Arousa, na marxe dereita, Muros e Corcubión.

 
A zona sur inclúe os ríos Verdugo, Lérez e Umia e as rías de Vigo, Baiona, Pontevedra e Arousa, na marxe esquerda.

Obxectivos
Os principais obxectivos deste plan son xestionar as alertas por vertido ao dominio público, localizar estes focos, avaliar a súa importancia e establecer o procedemento para acadar a súa eliminación.

Os responsables destes contratos tamén deberán identificar zonas potencialmente sensibles, realizar plans de recuperación de áreas danadas, desenvolver estudos concretos, implantar redes de control ou fomentar a concienciación social.

Xestión de alertas
O Plan de Control de Vertidos ten establecido un protocolo de actuacións coa Axencia Galega de Emerxencias (AXEGA) para garantir a eficiente resposta ás alertas en materia de vertidos que recibe o servizo de atención de emerxencias 112.

Este servizo centralizado de atención telefónica está dispoñible as 24 horas e os 365 días ao ano.
Ademais, os cidadáns tamén poden comunicar un vertido a un río ou ao mar a través da páxina web de Augas de Galicia.

O número total de alertas comunicadas desde o ano 2010 ata a actualidade ascende a 5.880. No que vai de ano lévanse atendido un total de 605 alertas.

 

O plan consta dun protocolo coa Axencia Galega de Emerxencias para garantir a resposta eficiente ás alertas de vertidos do 112

 

Inspección e seguimento
A Consellería de Infraestruturas e Mobilidade, mediante o Plan de Control de Vertidos, desenvolve un seguimento de todos os vertidos da Demarcación Hidrográfica de Galicia-Costa.

Para localizar estes focos e proceder á súa avaliación, os técnicos do plan efectúan campañas das redes fluviais e das rías e inspeccións rutineiras ou a raíz das alertas notificadas.

A Xunta, desde a posta en marcha deste plan realizou preto de 88.000 inspeccións, contabilizándose ao longo do que vai de ano 2021 un total de 7.136.

Inventario
O Plan de Control de Vertidos tamén inclúe o inventario de puntos de vertido, tanto en dominio público hidráulico como en dominio público marítimo-terrestre. Estes puntos clasifícanse segundo se consideren contaminantes, en investigación, cumpridores dos límites de vertido ou xa emendados.

O traballo de seguimento dos puntos ten contribuído a que os focos subsanados por Augas de Galicia ou que cumpren os límites de vertido ascendan ao 88% dos inventariados.

A Xunta considera prioritaria a protección das rías galegas para garantir a calidade das súas augas, que redundará no futuro de actividades estratéxicas na comunidade como a pesca, o marisqueo, a acuicultura ou o turismo.

A este respecto, o plan abrangue un exhaustivo e sistemático seguimento dos puntos de vertido inventariados nas rías co fin de emendar os posibles focos contaminantes.