Esta mañá tivo lugar no salón de sesións do Concello de Mos a presentación da II Fase Categoría Amateur Libre do Campionato Galego de Patinaxe Artística que organiza o mosense Club Rosaleira e que terá lugar o vindeiro sábado, 20 de novembro, de 10.00 a 20.30 horas no Pavillón Óscar Pereiro.

Na devandita presentación, que tivo lugar ás 10.00 horas, estiveron presentes Daniel Benavides Alonso, xefe de servizo do Servizo Provincial de Deportes de Pontevedra da Secretaría Xeral para o Deporte da Xunta de Galicia, Nidia Arévalo, alcaldesa de Mos, José Areal, concelleiro de Deportes e demais membros da Corporación Municipal mosense, Andrea Conde Rodríguez, Presidenta do Club Rosaleira, e Beatriz Fernández Bahamonde, Adestradora do Club Rosaleira.

Na II Fase Categoría Amateur Libre do Campionato Galego de Patinaxe Artística que se disputará o sábado no Pavillón Óscar Pereiro participarán un total de 75 patinadores e patinadoras de entre 13 e 20 anos de idade pertencentes a 30 clubes de patinaxe de toda Galicia.