Os 52 concellos de menos de 20.000 habitantes da provincia recibirán desde este luns un total de 120.100 novas máscaras nun operativo coordinado pola Deputación de Pontevedra no marco do acordo de colaboración institucional coa Subdelegación do Goberno e a Federación Española de Municipios e Provincias (FEMP), para facer chegar o material de protección aos colectivos máis vulnerables. As máscaras repartiranse con criterios obxectivos en función da poboación e do factor de envellecemento dos concellos como se vén facendo dende o comezo da pandemia.

Con esta son xa cinco as reparticións de máscaras efectuadas pola Deputación, sumando un total de 386.600 unidades. En concreto, a institución provincial achegou unha primeira remesa de  57.000 máscaras en maio de 2020, unha segunda de 97.500 en setembro, unha terceira de 58.000 en novembro e outra de 54.000 en decembro, gracias a este plan de cooperación institucional.

A Deputación enviou unha carta aos alcaldes e alcaldesas da provincia para informarlles da chegada deste novo envío destacando que o material está destinado “aos colectivos máis vulnerables do voso territorio”, xunto a operarios de limpeza e residuos sólidos, traballadores/as sociais e policías locais. Ademais explica os criterios de reparto, que asignan 1.250 unidades aos concellos de menos de 3.000 habitantes, 1.900 aos que teñen de 3.000 a 5.000, 2.500 aos que contan de 5.000 a 10.000 habitantes, 3.050 unidades aos de entre 10.000 e 15.000 habitantes e, finalmente, 3.500 aos concellos de 15.000 a 20.000 habitantes. As caixas, co material correspondente a cada concello, xa están preparadas e listas para o transporte que se fará, directamente, ata as casas do concello ou lugares que indique a persoa responsable de recibilas.