Miguel Alonso conta cunha traxectoria musical que abarca xa tres discos, ademais de proxectos paralelos como Minguante ou a banda infantil Música Miúda, sempre vencellado á música de autor en galego. En 2017 sorprendeu publicando a súa primeira novela, “O caso Quintana” (Belagua Ediciones), primeiro libro da serie “Os casos do cuarto 010”, as aventuras da estudante de psicoloxía Laura Mariño.

Agora publica “O caso dos amantes de París” (Belagua Ediciones), a segunda destas historias. Nesta novela negra, na que Laura terá que desenlear un novo misterio ao ritmo da chanson francesa, poderemos atopar críticas nada veladas ao xornalismo actual que exercen algúns medios.