O certame Enerxétika 2022, o cal ten lugar desde hoxe ata o vindeiro sábado no recinto  Feira Internacional de Galicia ABANCA, acolleu esta mañá a cuarta edición do Foro da Biomasa.

Baixo o lema “A biomasa, unha oportunidade estratéxica para Galicia”, este foro constitúese como un mecanismo aberto e participativo para impulsar a creación dunha industria da biomasa en Galicia, en consonancia cos obxectivos da Estratexia de Especialización Intelixente, RIS3, e os obxectivos de Europa de alcanzar a neutralidade climática.

A cita foi presentada por Francisco Javier Álvarez Pereiro, presidente do Clúster da Biomasa de Galicia. A primeira das sesións abordou os retos e iniciativas do sector da biomasa en Galicia, sendo o encargado da súa análise José Ignacio Lema Piñeiro, director da  Axencia Galega da Industria Forestal (XERA).

A continuación, centrouse nas liñas de apoio previstas para o período 2022-27. Deunas a coñecer Francisco Pedro López Martínez, subdirector de coordinación do Instituto  Galego de Promoción Económica (IGAPE), Juan Ignacio  R. Fernández-Arroyo, director do Departamento de Enerxía do Instituto  Enerxético de Galicia (INEGA), e Isabel Pontes Berdasco, directora da área de Promoción e Calidade Forestal de XERA.

A última das sesións mostrou casos de éxito. En canto á aplicación dunha rede de calor, expúxose a da Xunqueira (Pontevedra), por parte da Consellería de Cultura, Educación e  Universidade. No sector gandeiro destacáronse as instalacións de calor en granxas de  Nudesa, no agrícola fíxose o propio coa climatización en invernadoiros Flor San Campio e en servizos municipais explicouse a climatización na piscina municipal de Caldas de Reis.

Este IV Foro da Biomasa finalizou cunha visita a unha rede de calor con biomasa pioneira, o  District  Heating do  Concello de Silleda.

Numerosas xornadas

Ademais do IV Foro da Biomasa, a feira acolle hoxe un gran número de xornadas técnicas. Así, a Asociación de Empresas de Eficiencia Energética (A3E) abordou na feira os servizos para a mellora da eficiencia enerxética no sector municipal e privado, mentres que a Federación Galega de Asociacións de Instaladores Eléctricos e Telecomunicacións (Fegasinel) expuxo a tramitación administrativa e requisitos técnicos aplicables a instalacións de autoconsumo e as infraestruturas de recarga para vehículo eléctrico.

A Escola de Enxeñería de Minas e Enerxía da Universidade de Vigo celebrou dúas xornadas, centradas no proxecto Avienergy sobre aproveitamento enerxético no sector avícola e na avaliación da calidade do ambiente interior de edificios mediante técnicas de  Machine  Learning. A Consellería de Cultura, Educación e  Universidade da Xunta de Galicia explicou, pola súa banda, a aplicación da metodoloxía  Bim á xestión enerxética, mentres que a Asociación Nacional de Empresas de Servicios Energéticos (Anese) presentou o Observatorio de Eficiencia Enerxética 2021.

Tamén se celebraron as xornadas de presentación “Solargaps, primeiras persianas fotovoltaicas do mundo” e “ Prana recuperadores, únicos sistemas de ventilación sen condutos a base de cobre”, de  Kasaka Sistemas Enerxéticos.

Xa pola tarde, abordarase na feira a dixitalización no sector, por parte do Clúster de Enerxías Renovables de Galicia (Cluergal) e a publicación  Dínamo Técnica, tratando tamén esta última noutra xornada as oportunidades e retos da transición enerxética.