No derradeiro pleno do Concello de Mos, o PSOE de Mos presentou unha moción que viu motivada polo acto de entrega de agasallos de reis organizada polo Concello para as familias usuarias de servizos sociais. A raíz deste acto, no que cuestionaban a necesidade de expoñer as familias, decidiron propoñer a creación dunha tarxeta dende o concello para que as familias puidesen facer a compra dos alimentos e outros produtos coma o agasallo de reis.

Dita tarxeta tiña como finalidade "a integrtación destas familias na sociedade, como mecanismo de apoio para o difícil momento que atravesan pero tamén concienciación para que sexa unha compra de produtos básicos e de hixiene. Proposta que é levada a cabo noutros concellos e que é valorada como positiva por profesionais do sector dos servizos sociais, aínda que o PP mosense votou en contra".

Dende o PSOE explican que "a concelleira argumentou que estas tarxetas xa existen e que calquera persoa pode mercalas nos establecementos do Eroski e Gadis". Ao que os socialistas replicaron dicindo que "estas declaracións son escandalosas xa que a tarxeta Mos Axuda, posta en funcionamento durante a pandemia xa non está en uso, que non é algo que se poida mercar e que é o persoal de servizos sociais quen deben valorar o acceso a estas tarxetas. A isto súmanlle que a tarxeta a que fan referencia da Xunta está dando problemas para renovala e que en xuño cancélana, sen que se saiba se vai continuar".

Doutra banda os socialistas sinalan que "a concelleira afirmou que son os propios concelleiros que fan porta a porta polas empresas para pedir aportacións económicas para estas tarxetas, unha información difícil de verificar porque estas doazóns non están rexistradas nas arcas municipais. A afirmación da existencia duns fondos que descoñecen no concello parece ser un asunto moi cuestionable para os socialistas".

A voceira dos socialistas, Victoria Alonso, di estar "alarmada ante as declaración feitas no pasado pleno xa que son mentira e moi graves". Incide en que "en ningún momento cuestionaron a labor que se fai dende servizos sociais e que pode ser complementaria a outras medidas que se leven a cabo". Finaliza dicindo que "estas declaracións deben ser aclaradas ante a veciñanza, porque afirmaron a existencia de tarxetas que non están en funcionamento e aportacións de empresarios das que non hai rexistro". Polo tanto di a voceira, que "vai pedir explicacións formais e que se aclare este tema posto que o departamento de servizos sociais é un dos máis importantes e merece o máximo respeto".