A Deputación de Pontevedra continúa apostando polo seu modelo de mobilidade amable, sostible e segura con actuacións como a reforma e pavimentación do camiño de Sequeiros, en Gondomar. As obras neste viario, que é unha entrada ao núcleo do municipio, foron financiadas con 135.365 euros do Plan Concellos.

Con este proxecto, Gondomar poido continuar coas actuacións que xa iniciara no camiño e que tamén foran sufragadas con outros 165.000 euros do Plan Concellos 2018-2019. Os deputados provinciais Santos Héctor e Iria Lamas xunto co alcalde de Gondomar, Juan Francisco Ferreira, e o concelleiro de Vías e Obras, José Manuel Chamorro, achegáronse o pasado venres ata o camiño para coñecer de preto o seu novo estado.

Antes das actuacións, que tiveron un prazo de execución de dous meses, o pavimento deste camiño atopábase deteriorado e estaba degradado polo paso do tempo. Agora o camiño de Sequeiro segue o deseño paisaxístico doutros viarios do concello tras ter finalizado as diferentes obras que comprenderon, entre outras cuestións, a instalación de drenaxe superficial e a mellora da pavimentación mediante unha nova capa de rodadura.