O servizo dos GES no Valmiñor está a sufrir momentos de grande tensión entre o persoal que pode desencadenar graves consecuencias no correcto desenvolvemento do servizo. A CNT chama ao entendemento e ao diálogo para evitar que sexa a cidadanía a que pague a falla de consideración da delegada de persoal.

A negociación que se está a levar a cabo marca as bases do concurso de méritos e o proceso de estabilización, que definirán que persoal consolida a súa praza. A Delegada de persoal está tratando de negociar, unilateralmente, unhas bases que a beneficien a ela e ao persoal achegado a ela, sen ter en conta a opinión e os dereitos do resto de traballadores e traballadoras.

Tras a reunión mantida os días 10 e 21 de marzo de 2022 entre a Mancomunidade con traballadores dos GES, a CNT observa unha grave falta de transparencia e de diálogo, xa que os traballadores de baixa temporal non son informados e non lles permiten asistir nin acceder ao centro de traballo para participar das conversas.

Unha sentenza xudicial ven de constatar a división dos e das traballadoras, tras o acontecido o 30 de xuño do pasado ano, cando D. Juan Francisco Ferreira González, presidente da Mancomunidade de Concellos do Val Miñor, como xefe de persoal do Grupo de Emerxencias Supramunicipal (GES), emitiu o comunicado que impedía ás traballadoras en situación de incapacidade temporal acudir ao Centro de Traballo para formar parte das negociacións.