A caída dun raio foi a causa que provocou un pequeno incendio nun cadro eléctrico dun garaxe, moi preto dunha casa, no lugar de Bouzapanda, en Santo Estevo de Budiño, en Salceda de Caselas. Afortunadamente, ningunha persoa resultou ferida.

De feito, os mesmos donos da vivenda puideron extinguir o lume sen verse nada mais afectado.

O 112 Galicia tivo constancia dos feitos, sobre as 15:30 horas desta tarde. Foi a esa hora, cando un particular informaba aos xestores de emerxencias de ver saír fume do tellado dunha casa despois de caer un raio, sen asegurar se había xente afectada.

Nese intre, os xestores do 112 puxeron os feitos en coñecemento do persoal do Servizo de Urxencias Sanitarias de Galicia-061 e dos Bombeiros de Baixo Miño, ademais, pasaron aviso á Garda Civil, á Policía Local e aos efectivos da Agrupación de Voluntarios de Protección Civil da localidade.

Unha vez no lugar, os Bombeiros confirmaron que só ardera o cadro eléctrico, que fora apagado polos donos do inmoble.