A Concelleira de Persoal, Carme Fouces,  enfróntase á demanda que a CNT interpuxo contra o Concello de Pontevedra pola modificación unilateral dos horarios do persoal do Servizo de Extinción de Incendios e Salvamento.

Tras a proposta do persoal do SEIS, de ampliar o persoal para equipararse no número de efectivos por habitante a cidades da súa contorna como Ourense ou Compostela, o Concello de Pontevedra "impuxo un cuadrante e un calendario que supón a retirada sistemática do descanso dos bombeiros, diminuíndo os grupos de traballo e aumentando as rotacións".

Esta modificación supón "a imposición encuberta dun sistema de dispoñibilidade, impoñendo aos traballadores a realización de horas extraordinarias estruturais". Tras a modificación, rexeitada por todo o persoal, pasan a cumprir 120 xornadas de dispoñibilidade para cubrir ausencias, sendo os traballadores en día libre os que están obrigados a cubrir as baixas dos seus compañeiros.

A situación, que ven prolongándose dende o novembro pasado, está impedindo a conciliación dos membros do SEIS e empeorando claramente o servizo. Desde a sección sindical da CNT apuntan que “o grande problema do SEIS é a falta de persoal, que sitúa á cidade de Pontevedra á cola de Europa en canto á cociente de bombeiros por habitante, apenas 1 efectivo por cada 2.217 habitantes, cando incluso en cidades do entorno e similares é moi inferior, como Compostela (1/1604) ou Ourense (1/1467)”.

Tras presentar a demanda a CNT lembra ao Concello que non é tarde para o entendemento, e que a proposta do persoal de reorganizar o tempo de traballo e o incremento progresivo até acadar os 57 efectivos no ano 2026, fronte aos 38 da actualidade, é unha vía que mellora a conciliación, pero tamén un servizo indispensable para a cidadanía.